مولانا محمد ابراہیم بلیاوی
ابھی مولانا شاہ وصی اﷲ صاحبؒ کا غم تازہ تھا کہ ایک اور بزرگ ہستی کا سایہ اٹھ گیا، رمضان المبارک کے آخری عشرہ میں مولانا محمد ابراہیم صاحب بلیاوی صدر مدرس دارالعلوم دیوبند نے وفات پائی مرحوم اس دور کے نامور عالم دین اور صاحب تقویٰ بزرگ تھے تقریباً نصف صدی تک دینی علوم کے درس کی خدمت انجام دی اور ان کے چشمۂ فیض سے ہزاروں تشنگان علم سیراب ہوئے، ان کی وفات سے علم و عمل، درس و تدریس اور تدین و تقویٰ کی ایک بڑی یادگار مٹ گئی اﷲ تعالیٰ ان کے مدارج بلند فرمائے۔
(شاہ معین الدین ندوی، جنوری ۱۹۶۸ء)