سعید الحق دیسنوی
حضرت سید صاحب رحمۃ اﷲ علیہ کے ایک لائق عزیز سعیدالحق دیسنوی پاکستان ریڈیو میں ایک بڑے عہدہ پر ممتاز تھے، ان کو حضرت سید صاحب سے قلبی لگاؤ تھا، انھوں نے ان پر انگریزی اخبارات و رسائل میں کئی مضمون لکھے، ان کی مشہور تصنیف خطبات مدراس کا انگریزی میں ترجمہ کیا، جو شائع ہوچکا ہے، ان کی دوسری تصنیف عرب و ہند کے تعلقات کا بھی ترجمہ کیا جو بالاقساط اسلامک کلچر حیدرآباد میں شائع ہوا، مشرقی پاکستان کی سلیمان اکیڈمی کے بھی بانیوں میں تھے، افسوس ہے کہ گزشتہ مہینہ ان کا انتقال ہوگیا اور ان کی ذہانت اور صلاحیت سے جو امیدیں تھیں وہ پوری نہ ہوسکیں، ان کی کل عمر اٹھاون سال تھی، اﷲ تعالیٰ ان کی مغفرت فرمائے۔ (شاہ معین الدین ندوی، اپریل ۱۹۶۸ء)