رئیس احمد جعفری
سید نجیب اشرف صاحب مرحوم کی موت کا زخم ابھی تازہ تھا کہ ندوے کے ایک اور نامور فرزند رئیس احمد جعفری نے بھی داغ مفارقت دیا، اکتوبر کی آخری تاریخوں میں پاکستان میں ان کا انتقال ہوا، جوار لکھنؤ کا قصبہ خیرآباد ان کا وطن تھا، مشہور شاعر، ریاض خیر آبادی کے نواسے تھے، راقم جب ندوہ میں آخری درجوں میں تھا، مرحوم ابتدائی درجوں میں تھے، عربی کی تعلیم کے بعد جامعہ ملیہ میں انگریزی کی تعلیم حاصل کی، پھر خلافت اخبار بمبئی کے اڈیٹوریل اسٹاف میں ملازم ہوگئے، بعد میں اس کے اڈیٹر بھی ہوگئے تھے، قیام پاکستان کے بعد لاہور چلے گئے۔
مرحوم میں تالیف و تصنیف کا ذوق فطری تھا، طالب علمی کے زمانے میں بھی خامہ فرسائی کیا کرتے تھے، ان کے قلم میں بڑا زور تھا، جس پر ان کی پہلی تصنیف سیرت محمد علی شاہد ہے، اس وقت ان کی عمر پچیس چھبیس سال سے زیادہ نہ رہی ہوگی، بڑے زودنویس تھے، ان کا قلم ہمیشہ رواں دواں رہتا تھا، بڑی بڑی ضخیم کتابیں چند دن میں لکھ ڈالتے تھے، ادب و افسانے سے لے کر تاریخ و مذہبیات تک میں ان کے قلم کی جولانی یکساں تھی، ہر صنف میں ان کی تصانیف موجود ہیں، اس دور کے مصنفین میں کثرت تصانیف کے لحاظ سے ان کا نام سرفہرست ہوگا، ادارہ ثقافت اسلامیہ لاہور کے قیام کے بعد اس سے متعلق ہوگئے تھے، اور اس کے لیے کئی کتابیں لکھیں، اس کے رسالہ ثقافت اسلامیہ حال المعارف میں ان کے مضامین نکلتے رہتے تھے، اس کے تازہ اکتوبر نمبر میں بھی ان کا ایک مضمون ’’عالم اسلام سے مسلمانان برعظیم کی وابستگی‘‘ شائع ہوا ہے، کیا خبر تھی کہ یہ ان کا آخری مضمون ہے۔ (شاہ معین الدین ندوی، نومبر ۱۹۶۸ء)