مولانا حمید الدین
گزشتہ مہینہ مولانا حمیدالدین صاحب محدث اور ان کے ایک کمسن نواسے مولانا اسعد مدنی کے صاحبزادے نے کار کے حادثہ میں وفات پائی، مرحوم مولانا حسین احمد صاحب مدنی کے قریبی عزیز تھے، ان کی پوری زندگی دینی علوم خصوصاً حدیث نبوی کی خدمت میں گزری، ابتداء میں دارالعلوم دیوبند میں مدرس تھے، کچھ دنوں تک دارالعلوم ندوۃ العلماء میں بھی حدیث کا درس دیا، ادھر عرصہ سے مدرسہ عالیہ کلکتہ میں شیخ الحدیث تھے، علم کے ساتھ عمل اور اصلاح و تقویٰ کے زیور سے بھی آراستہ اور طبعاً خاموش، متین اور مرنجان مرنج انسان تھے، یہ المناک حادثہ بجائے خود ایک طرح کی شہارت ہے۔ اﷲ تعالیٰ، حدیث نبوی کے اس خادم کو اپنی رحمت و مغفرت سے سرفراز فرمائے، دارالمصنفین اس حادثہ میں مولانا اسعد مدنی کا شریک غم ہے۔ (شاہ معین الدین ندوی، دسمبر ۱۹۶۸ء)