مولانا لقاء اﷲ عثمانی
افسوس ہے کہ گزشتہ مہینہ مولانا لقاء اﷲ صاحب عثمانی نے وفات پائی، مرحوم تحریک خلافت کے دور کی یادگار تھے، ایک زمانہ میں قومی و ملی تحریکوں میں ان کا نمایاں حصہ رہا، ان کا سب سے بڑا کارنامہ یہ ہے کہ ۴۷؁ء کے خونیں ہنگامے میں جب پانی پت مسلمانوں سے خالی ہوگیا تھا، اس کی مسجدیں ویران اور خانقاہیں سونی ہوگئی تھیں، ان کے پائے ثبات میں لغزش نہ آئی اور انھوں نے اپنے جدامجد حضرت جلال الدین کبیر الاولیاءؒ کا آستانہ نہ چھوڑا، ان کے اس استقلال سے مسلمانوں کے اکھڑے ہوئے قدم دوبارہ جم گئے اور ان کی دینداری اور حسن اخلاق سے وہ شرنار تھی جو مسلمانوں کے خون کے پیاسے تھے ان کے عقیدت مند بن گئے اور آج پانی پت میں جو مسلمان نظر آتے ہیں، وہ سب ان کے استقلال اور قوت ایمانی کا نتیجہ ہے، اﷲ تعالیٰ اس مرد مجاہد کے مراتب بلند فرمائے۔ (شاہ معین الدین ندوی،جنوری ۱۹۶۹ء)