مفتی محمد قائم فرنگی محلی
افسوس ہے کہ گذشتہ مہینہ مفتی محمد قائم صاحب فرنگی محلی نے انتقال فرمایا، مرحوم درس و تدریس اور فقہ و فتاویٰ میں خانوادہ فرنگی محل کی آخری یادگار تھے، ایک مدت تک مدرسہ حنفیہ جو نپور کے صدر مدرس رہے، مگر ادھر عرصہ سے کبرسنی کے باعث خانہ نشین ہوگئے تھے، چند برسوں سے بالکل معذور ہوگئے تھے، مگر اس حالت میں بھی افتا کا کام جاری تھا، اور مولانا محمد رضا فرنگی محلی ان کی نگرانی میں اس کو انجام دیتے تھے، فقہ کے علاوہ حدیث و رجال پر بھی ان کی وسیع نظر تھی، جس پر ان کی تصنیف معیار الحدیث شاہد ہے، اخلاق و وضعداری میں پرانے بزرگوں کا نمونہ تھے، ان کی وفات سے فرنگی محل کی علم وفضل کی آخری یادگار مٹ گئی۔ والبقاء ﷲ وحدہ۔ اﷲ تعالیٰ ان کی مغفرت فرمائے۔ (شاہ معین الدین ندوی، جنوری ۱۹۷۰ء)