سید محسن الحکیم
یہ سطریں زیر تحریر تھیں کہ عراق کے مجتہد اعظم آقائے سید محسن الحکیم کی وفات کی خبر ملی، وہ شیعوں کے سب سے بڑے مذہبی پیشوا اور اعلم کے منصب جلیل پر فائز تھے، مذہبی امور میں ان کا فیصلہ حرف آخر کا حکم رکھتا تھا، جس کے سامنے پوری شیعی دنیا سرتسلیم خم کرتی تھی، علمی حیثیت سے وہ دنیائے اسلام کے نامور علماء میں تھے اور سنیوں میں بھی عزت و احترام کی نظر سے دیکھے جاتے تھے، انھوں نے اپنے فرقہ کی بڑی مفید علمی و دینی خدمات انجام دی ہیں، اسی کے ساتھ وہ اتحاد اسلامی کے بھی قائل تھے اور شیعہ سنی اختلاف کو ناپسند کرتے تھے، اﷲ تعالیٰ ان کو اپنی رحمت و مغفرت سے سرفراز فرمائے۔
سنیوں کے یہاں اس قسم کا کوئی منصب نہیں ہے، جس کو پوری سنی دنیا ماننے پر مجبور ہو، اس کانتیجہ یہ ہے کہ ان میں ہر شخص مجتہد ہے اور جن کو نہ صرف دینی علوم سے کوئی واقفیت نہیں بلکہ مذہب سے بھی عملاً کوئی علاقہ نہیں، ان کو بھی اجتہاد کا دعویٰ ہے، چنانچہ آج کل ایسے بہت سے مجتہد اور مفسر قرآن ملیں گے جو عربی کی ابجد سے بھی واقف نہیں، ان کام یہ ہے کہ جو نیا قالب نظر آئے اسلام کو اس میں ڈھالنے کی کوشش کریں، ان کے اجتہاد کے عجیب و غریب نمونے آئے دن نظر آتے رہتے ہیں، اور اس تخریب کا نام انھوں نے اسلامی خدمت رکھا ہے، شیعوں کے نظام میں اگرچہ تنگی ہے، لیکن مذہبی ضبط و نظام کے نقطۂ نظر سے بہت مفید ہے۔ (شاہ معین الدین ندوی، جون ۱۹۷۰ء)