پروفیسر عبدالقادر سروری مرحوم
افسوس ہے کہ گذشتہ مہینہ پروفیسر عبدالقادر سروری مرحوم صدر شعبۂ اردو کشمیر یونیورسٹی نے دفعتہ انتقال کیا، اس سے پہلے وہ عثمانیہ یونیورسٹی میں تھے، ان کا وطن بھی حیدرآباد تھا، پروفیسرزور مرحوم کے انتقال کے بعد ان کی جگہ کشمیر یونیورسٹی میں آگئے تھے، مرحوم اردو زبان کے بڑے مخلص خدمت گذار تھے، اگرچہ وہ شعبہ اردو کے صدر اور متعدد کتابوں کے مصنف تھے، لیکن ان میں طالب علمانہ شوق اور طلب تھی، انجمن ترقی اردو کے جلسوں میں بارہا ان سے ملاقات ہوئی، بڑے متواضع اور خاکسار تھے، اﷲ تعالیٰ ان کی مغفرت فرمائے۔ (شاہ معین الدین ندوی، اپریل ۱۹۷۱ء)