مولانا احتشام الحسن کاندھلوی
مذہبی حلقہ کے لیے مولانا احتشام الحسن کاندھلوی کی وفات بھی بڑا حادثہ ہے، وہ اس دور کے صاحب تدین و تقویٰ عالم تھے، شیخ التبلیغ مولانا محمد الیاس رحمۃ اﷲ علیہ کے مجاز اور تبلیغی کاموں میں ان کے دست راست تھے، انھوں نے تبلیغ کو زندگی کا مقصد بنالیا تھا، ہر وقت اسی کی دھن رہتی تھی۔ انھوں نے بہت سے تبلیغی رسائل بھی لکھے، ان کی صحت عرصہ سے خراب تھی، اس کے علاوہ مختلف قسم کی مشکلات میں مبتلا رہے، لیکن کوئی معذوری تبلیغی کام میں حائل نہ ہوسکی اور مرض الموت تک اس کام کو انجام دیتے رہے، اﷲ تعالیٰ ان کے مدارج بلند فرمائے۔ (شاہ معین الدین ندوی، جنوری ۱۹۷۲ء)