یحییٰ اعظمی
ناظرین کو یہ معلوم کر کے افسوس ہوگا کہ دفتر دارالمصنفین کے منصرم یحییٰ صاحب اعظمی نے چند دنوں کی علالت کے بعد ۲۲؍ فروری کو انتقال کیا، وہ عمر بھر دارالمصنفین سے وابستہ رہے اور مرکر اس سے جدا ہوئے، مرحوم بڑے متدین اور دفتری کاموں میں تجربہ کار تھے، ہزاروں روپیے کا کاروبار ان کے ہاتھ میں تھا اور کبھی ایک حبہ کا فرق نہیں نکلتا تھا، ایسے قابل اعتماد آدمی مشکل سے ملیں گے، طبیعت میں حد سے زیادہ نظافت و نفاست تھی، بڑی صاف ستھری زندگی بسر کرتے تھے، ان کا دفتری کام بھی بڑا صاف ستھرا تھا، خشک دفتری کاموں کے ساتھ خوشگو شاعر بھی تھے، ان کے کلام کے دو مجموعے ’’نوائے حیات‘‘ اور ’’نوائے عصر‘‘ شائع ہوچکے ہیں، اﷲ تعالیٰ ان کی مغفرت فرمائے۔
(شاہ معین الدین ندوی، مارچ ۱۹۷۲ء)