مولانا ضیاء الدین احمد بدایونی
افسوس ہے کہ گذشتہ جولائی میں ایک ممتاز علمی شخصیت مولانا ضیاء احمد بدایونی سابق صدر شعبہ فارسی مسلم یونیورسٹی نے وفات پائی ، مرحوم فارسی زبان کے فاضل اور مسلم الثبوت استاد تھے، انہوں نے فارسی کی درسیات پرانے طرز پر پڑھی تھیں اور عربی سے بھی واقف تھے، اس لیے فارسی زبان و ادب پر ان کی نظر ماہرانہ تھی، ان کا ذوق بڑا متنوع تھا، مذہبیات اور تاریخ اسلام سے بھی ان کو دلچسپی تھی، اور ان سب پر ان کے مضامین اور تصانیف موجود ہیں، ان میں سب سے اہم دیوان مومن کی شرح اور اس کا فاضلانہ مقدمہ ہے اور یہ کہنا صحیح ہوگا کہ جس طرح سب سے پہلے ڈاکٹر عبدالرحمن بجنوری نے کلامِ غالب کی اہمیت نمایاں کی تھی، اسی طرح مولانا ضیاء احمد نے مومنؔ کے کلام کی اہمیت واضح کی، وہ عملاًنہ صرف دیندار بلکہ خوش عقیدہ مسلمان تھے، جس کا اثر ان کی تمام مذہبی تحریروں میں ہے، اس زمانہ میں جب کہ فارسی کا ذوق گھٹتا جا رہا ہے مرحوم کی جگہ مشکل سے پُر ہوسکے گی، اﷲ تعالیٰ ان کی مغفرت فرمائے۔ (شاہ معین الدین ندوی، ستمبر ۱۹۷۳ء)