ڈاکٹر عبدالمعید خان
جامعہ عثمانیہ حیدرآباد کے شعبہ عربی کے صدر ڈاکٹر عبدالمعید خاں کی وفات علمی حلقہ کے لیے ایک سانحہ ہے، انھوں نے قاہرہ اور کیمبرج میں تعلیم پاکر ساری عمر جامعہ عثمانیہ کی خدمت میں گذاری، کچھ دنوں آکسفورڈ یونیورسٹی میں بھی عربی کے پروفیسر رہے، حیدر آباد کے مشہور انگریزی رسالہ اسلامک کلچر کی ادارت کے فرائض آخر وقت تک بڑی خوبی سے انجام دیئے مارماڈیوک پکتھال نے اس کا جو معیار قائم کیا تھا، اس کو انھوں نے قائم رکھا، دائرۃالمعارف حیدرآباد کی علمی سرگرمیوں میں بھی ان کا بڑا حصہ رہا، ان کی رہنمائی میں یہاں سے بہت سی مفید کتابیں شائع ہوئیں، مولانا ابوالکلام آزاد ان کی علمی صلاحیتوں کے معترف تھے، وہ حکومت کی علمی کمیٹیوں میں نامزد ہوتے رہے، جہاں وہ عزت کی نظر سے دیکھے جاتے تھے، امید ہے کہ جامعہ عثمانیہ ان کو ایک نامور فرزند کی حیثیت سے برابر یاد رکھے گی۔
(صباح الدین عبدالرحمن، نومبر ۱۹۷۳ء)