سلام مچھلی شہری
افسوس ہے کہ سلام مچھلی شہری بھی چل بسے، وہ ممتاز ترقی پسند شاعر تھے، اعظم گڑھ اور دارالمصنفین سے ان کے تعلقات بہت پرانے تھے، جس کا انھوں نے ہمیشہ لحاظ رکھا، کئی مہینے ہوئے خبر ملی تھی کہ انھوں نے شراب سے توبہ کر لی ہے، اس خبر سے قدرۃً خوشی ہوئی، اتفاق سے اسی زمانہ میں انھوں نے جدید طرز میں ایک نعت کہہ کر معارف میں اشاعت کے لیے بھیجی، میں نے ان کو توبہ پر مبارک باد دی اور لکھا کہ نعت کے لیے پرانا طرز ہی مناسب ہے، انھوں نے جواب میں لکھا کہ انھوں نے شراب سے توبہ کرلی ہے اور دعا فرمائیے کہ خدا استقامت عطا فرمائے اور اپنے موروثی مذہبی اثرات کا بھی حوالہ دیا، اور دوسری نعت کہہ کر بھیجنے کا وعدہ کیا، مگر ابھی اس کے ایفا کی نوبت نہ آئی تھی کہ ان کا وقت پورا ہوگیا، شراب نے ہمارے بہت سے ہونہار شعراء کو تباہ کیا ہے، شکر ہے کہ سلام اس سے تائب ہوگئے تھے، جو ان کی عاقبت کے لیے فال نیک ہے، اﷲ تعالیٰ ان کی توبہ قبول اور ان کی مغفرت فرمائے۔
(شاہ معین الدین ندوی، دسمبر ۱۹۷۳ء)