شیخ انس یٰسین
دوسرا حادثہ سعودی عرب کے سابق ہندوستانی سفیر شیخ انس یٰسین کی وفات کا ہے، ابھی وہ جوان تھے، لیکن تدبر و معاملہ فہمی میں تجربہ کار بوڑھوں سے کم نہ تھے، وہ مختلف اوقات میں مختلف ملکوں کی سفارت پر رہے، آج کل ٹرکی میں سفیر تھے، وہیں کار کے حادثہ میں وفات پائی، ان میں اپنے مذہب و ملت کا بڑا درد تھا، ہندوستان کے اسلامی اداروں سے ان کو خاص دلچسپی تھی، اپنی سفارت کے زمانہ میں متعدد اداروں کو دیکھا اور ان کی مدد بھی کی، دارالمصنفین کے بھی محسن تھے، یہاں آنے کا وعدہ بھی کیا تھا، مگر ایسے موقع پیش آتے رہے کہ آنا نہ ہوسکا، دو سال ہوئے دارالعلوم ندوۃ العلماء کے مدرسہ ثانویہ کی عمارت کا سنگ بنیاد رکھنے کے لئے لکھنو آئے تھے تو ان سے ملاقات ہوئی تھی، اﷲ تعالیٰ ان کی مغفرت فرمائے۔ (شاہ معین الدین ندوی،اگست ۱۹۷۴ء)