مولانا ابو الوفاء افغانی
معارف کے قارئین مولانا ابوالوفاء افغانی کے نام سے اور کام سے بخوبی واقف ہیں ان کی پیدائش افغانستان میں ہوئی، لیکن تعلیمی مراحل ہندوستان میں طے ہوئے اور یہاں کے باکمال اساتذہ سے استفادہ کیا، زندگی کا بڑا حصہ حیدرآباد میں گزرا، عرصہ تک مدرسہ نظامیہ میں مدرس رہے، فقہ حنفی سے خاص مناسبت تھی اور امام ابوحنیفہ ان کے تلامذہ اور ائمہ احناف سے بے حد عقیدت تھی، لجنۃ احیاء المعارف العثمانیہ ان کی اس عقیدت کی گواہ ہے، انھوں نے قاضی ابو یوسف امام محمد اور شمس لائمہ سرخسی کی کتابیں ڈھونڈ کر جمع کیں، بڑی دیدہ ریزی کے ساتھ مختلف نسخوں کا مقابلہ کیا، جان کا ہی کے ساتھ ان کی تصحیح کی، حواشی لکھے، انڈکس بنائے اور حسن و خوبی کے ساتھ طباعت کا انتظام کیا، وہ پرانے مدرسوں کے پڑھے ہوئے تھے، لیکن نئے محققین بھی ان کا لوہا مانتے تھے، افسوس ہے کہ گزشتہ ماہ علم و تحقیق کی یہ شمع خاموش ہوگئی، اﷲ تعالیٰ ان کو اپنی رحمتوں سے سرفراز فرمائے اور ان کے بیش بہاکاموں کے جاری رکھنے کا انتظام فرمائے۔
(عبد السلام قدوائی ندوی، ستمبر ۱۹۷۵ء)