مولانا محمد شاہد فاخری
افسوس ہے کہ گزشتہ ماہ مولانا محمد شاہد فاخری نے وفات پائی، وہ الہ آباد کے مشہور مذہبی خانوادہ دائرہ شاہ اجمل سے تعلق رکھتے تھے، مذہبی کاموں کے ساتھ ان کو ملک کے سماجی اور سیاسی مسائل سے بھی دلچسپی تھی، وہ جمعیۃ علمائے ہند کے نائب صدر تھے، انھوں نے آزادی کی جدوجہد میں نمایاں حصہ لیا تھا اور قیدوبند میں بھی مبتلا ہوئے تھے، آزادی کے بعد بھی وہ ملک و ملت کی خدمت میں لگے رہے اور اس راہ میں مشکلات و مصائب برداشت کرتے رہے، وہ دارالمصنفین کے کاموں کے بڑے قدرداں اور مداح تھے، اﷲ تعالیٰ ان کی مغفرت فرمائے اور انھیں اپنی رحمتوں سے سرفراز فرمائے۔ (عبد السلام قدوائی ندوی، اکتوبر ۱۹۷۵ء)