ڈاکٹر عبدالعلیم
ڈاکٹر عبدالعلیم سابق وائس چانسلر مسلم یونیورسٹی علی گڑھ اور صدر اردو بورڈ دہلی کی اچانک وفات سے پورے علمی حلقہ کو دکھ ہے، ان کے خیالات کچھ بھی رہے ہوں، لیکن وہ اپنی شرافت طبع اور مرنجان مرنج رویے کی وجہ سے ہر حلقہ میں پسند کئے جاتے تھے، جہاں رہے ان کا وزن اور وقار رہا، دارالمصنفین سے ان کے تعلقات برابر خوشگوار رہے، مسلم یونیورسٹی کے عربی اور اسلامیات کے شعبوں کو ترقی دینے میں بھی ان کی خدمات برابر یاد کی جائیں گی، وہ مسلم یونیورسٹی کے وائس چانسلر بہت ہی نازک دور میں بنائے گئے، ان پر نظر انتخاب ڈاکٹر ذاکر حسین خاں مرحوم کی پڑی تھی، جو ان کو بہت محبوب رکھتے تھے، انھوں نے جامعہ ملیہ میں تعلیم پائی، ان کی وفات سے جامعہ ایک لائق فرزند علمی حلقہ ایک شریف اہل علم اور ملک ایک بہت ہی باوقار محب وطن سے محروم ہوگیا، اﷲ تبارک و تعالیٰ ان کو غریق رحمت کرے، آمین۔ (صباح الدین عبدالرحمن، مارچ ۱۹۷۶ء)