محمد یوسف صدیقی
جناب محمد یوسف صدیقی کی وفات بھی باعث رنج و ملال ہے، وہ ایم اے او کالج علی گڑھ میں ڈاکٹر حسین مرحوم کے کلاس فیلو تھے، تحریک ترک موالات کے اثر سے ۱۹۲۰؁ء میں وہ جامعہ آئے، کچھ عرصہ کے بعد معاشی مسائل میں لگ گئے، لیکن تحریک خلافت اور ترک موالات کا اثر ان کے دل سے کبھی نہیں گیا اسی اثر کے ماتحت وہ جماعت اسلامی میں شامل ہوئے اور قومی و ملی تحریکوں سے دلچسپی لیتے رہے، جامعہ کی محبت بھی برابر ان کے دل میں جاگزیں رہی اور اس کے اہم جلسوں اور تقریروں میں حتی الامکان شریک ہوتے رہے، ان کی دینداری، خلوص اور وضع داری ہمیشہ یاد رہے گی، اﷲ تعالیٰ ان کی مغفرت فرمائے اور ان کے پس ماندگان کو حق پسندی اور نیک روی کی توفیق نصیب فرمائے۔ (’’ع ۔ق‘‘، جون ۱۹۷۶ء)