محمد ثانی حسنی
ان سطروں کے لکھتے وقت مولانا سید ابوالحسن علی ندوی کے عزیز بھانجے جناب محمد ثانی حسنی کی وفات حسرت آیات کی اندوہناک خبر ملی، ان کو مولانا علی میاں اپنے فرزند کے برابر سمجھتے رہے، وہ اپنی متانت ، سنجیدگی اور خاموشی کی وجہ سے اپنے حلقہ میں بڑی قدر کی نظر سے دیکھے جاتے تھے، بڑے اچھے اہل قلم بھی تھے، ان کی کتابوں میں ایمانی حرارت و حمیت جلوہ گر رہتی تھی، ان کی وفات سے دارالمصنفین بھی سوگوار ہے، اس لیے بھی کہ یہاں جو سیمینار ہورہا ہے اس کے روح رواں مولانا علی میاں اور ان کے دست و بازو مولانا رابع ندوی تھے، جو مرحوم کے منجھلے بھائی تھے، ان کی سوگواری سے ہمارے سیمینار کی فضا بھی غم ناک رہے گی، دعا ہے کہ مرحوم کو کروٹ کروٹ جنت نعیم اور ان کے سوگوارماموں، بھائیوں اور بچوں کو صبر جمیل عطا ہو۔ (صباح الدین عبدالرحمن، فروری ۱۹۸۲ء)