سید محامد علی عباسی
افسوس ہے کہ دارالمصنفین کی مجلس انتظامیہ کے ایک معزز مخلص رکن جناب سید محامد علی عباسی ائی۔اے۔ایس ۱۵؍ ستمبر کو حیدرآباد میں وفات پاگئے، اِناﷲ وَ اِنا اِلَیہ رَاجِعُون، یہ اطلاع بہت تاخیر سے ان کے ہم وطن مولوی معین احمد علوی کاکوروی کے مکتوب گرامی سے ملی۔ ان کی زندگی حیدرآباد میں بسر ہوئی، دارالمصنفین کے بڑے قدرداں تھے، وہ نظام ٹرسٹ کے بہت بااثر رکن تھے، اس سے دارالمصنفین کو سالانہ گرانٹ دلائی اور اس کے لئے سفر کی صعوبت برداشت کرکے یہاں تشریف بھی لائے، بڑی خوبیوں کے مالک تھے، اونچے عہدوں پر فائز رہنے کے باوجود متواضع تھے، اپنی دیانت داری، حسن خدمت اور قابلیت کی وجہ سے نیک نامی حاصل کی اور بڑا عروج پایا، ان کی شخصیت باوقار، پرکشش اور قدیم شرافت و تہذیب کا دلکش نمونہ تھی، گزشتہ برس ہمدرد نگر میں ہونے والے دارالمصنفین کے جلسہ میں شرکت فرمائی، کیا خبر تھی کہ اس عالم ناسوت میں یہ ان سے آخری ملاقات ہے، اﷲ تعالیٰ مغفرت فرمائے اور اعزہ متوسلین کو صبر جمیل عطا کرے۔ (ضیاء الدین اصلاحی، نومبر ۱۹۸۹ء)