مولانا محمد سلمان خاں بھوپالی ندوی مرحوم
ندوۃ العلما کے ایک اور لایق فرزند اور مولانا محمد عمران خاں بھوپالی ندوی مرحوم کے برادر خورد جناب مولانا محمد سلمان خاں ندوی مرحوم کی وفات حسرت آیات کی خبر بہت تاخیر سے ان کے صاحبزادے مولوی حافظ کلیم خاں ندوی کے ایک خط سے ملی، اناﷲ وانا الیہ راجعون۔ وہ دارالعلوم تاج المساجد کے سابق مہتمم تھے، لیکن ان کا سب سے روشن کارنامہ تاج المساجد کی تعمیر نو ہے۔ مولانا محمد عمران خاں ندوی مرحوم نے جس شاہانہ اولوالعزمی سے اس عظیم الشان مسجد کی تعمیر و تکمیل کا خاکہ بنایا تھا اس کو مولانا سلمان خاں صاحب نے حقیقتاً رنگ و روغن عطا کیا، جن لوگوں نے مسجد کی تعمیر و تکمیل میں ان کی شبانہ روز کی محنت، جانفشانی اور لگن دیکھی ہے وہ جانتے ہیں کہ اس تعمیر میں ان کا لہو تک شامل ہوگیا ایک عالم کی اس معمارانہ اور مہند سانہ مہارت پر بڑے بڑے انجینئر اور آرکی ٹیکٹ بھی حیران رہ گئے، طبعاً وہ نہایت شریف، متین، کم سخن اور مہمان نواز انسان تھے، اپنے تمام بیٹوں کو انھوں نے حفظ قرآن مجید کی دولت سے بہرہ یاب کیا اور سب کوند وہ ہیں تعلیم دلائی، وہ خود بڑے دیندار تھے متعدد بار حج بیت اﷲ کی سعادت حاصل کی۔ اﷲ تعالیٰ ان کی نیکیوں اور دینی خدمات کو قبول کرے اور جنت نعیم میں جگہ عطا فرمائے، آمین۔ ( عمیر الصدیق دریابادی ندوی ، اگست ۱۹۹۱ء)