صباح الدین عمر
افسوس ہے کہ اردو کے ایک عاشق و شیدائی جناب صباح الدین عمر کا انتقال ہوگیا، وہ لکھنؤ کی روایات کے بڑے دلدادہ اور اس کی تہذیب و ثقافت کا نمونہ تھے، وہ سرکاری ملازم تھے، یوپی کے محکمہ اطلاعات کے اردو ماہنامہ ’’نیادور‘‘ کے ایڈیٹر بھی رہے، اترپردیش اردو اکادمی کے قیام کے بعد اس کے سکریٹری ہوئے اور اس کا رسالہ اکادمی ان کی ادارت میں شائع ہوا، ریٹائرڈ ہونے کے بعد اردو اکادمی اور فخرالدین علی احمد میموریل کمیٹی کے برابر رکن رہے اور ان کو اپنے مشوروں اور تجربوں سے بڑا فائدہ پہنچایا، طبعاً شریف اور مخلص تھے، دوسروں کی مدد کرکے خوشی محسوس کرتے تھے، اﷲ تعالیٰ اردو کے اس عاشق و خادم کی مغفرت فرمائے، آمین!! (ضیاء الدین اصلاحی۔ دسمبر ۱۹۹۱ء)