بیگم سلطانہ حیات
افسوس ہے کہ اردو کی ایک عاشق وفدائی اور اتر پردیش میں اردو تحریک کی قائد بیگم سلطانہ حیات صاحبہ ۷؍ جون کو رحلت فرماگئیں، وہ تقریباً نصف صدی تک اردو کے فروغ کے لیے سرگرم عمل رہیں، ۵۵؁ء میں انجمن ترقی اردو ہند نے اردو کو اتر پردیش میں علاقائی زبان تسلیم کرانے کے لیے دستخطی مہم چلائی جس کو کامیاب بنانے میں انھوں نے اور ان کے شوہر جناب حیات اﷲ انصاری نے غیر معمولی دلچسپی لی اور اتر پردیش کے مختلف علاقوں کا دورہ کیا، وہ اس وفد میں بھی شامل تھیں جو ۲۲ لاکھ دستخطوں کے ساتھ میمورنڈم لے کر اس وقت کے صدر جمہوریہ ڈاکٹر راجندر پرشاد کے پاس گیا تھا، انھوں نے ’’تعلیم گھر‘‘ کے نام سے ایک ادارہ بھی قائم کیا تھا، اس نے اترپردیش میں اردو کے کئی اسکول قائم کیے جن سے ہر سال سینکڑوں طلبہ فیضیاب ہوتے تھے، وہ طبعاً نیک، شریف اور درد مند خاتون تھیں، اﷲ تعالیٰ اردو کی اس مجاہدہ اور خادمہ کی مغفرت فرمائے، آمین۔ (ضیاء الدین اصلاحی، جولائی ۱۹۹۴ء)