مولانا سید محمد مرتضیٰ مظاہری مرحوم
ندوۃ العلماء کے کتب خانہ شبلی کے ناظر مولانا سید محمد مرتضیٰ مظاہری بھی ۳؍ اور ۴؍ نومبر کی درمیانی شب میں لکھنؤ میں انتقال فرماگئے، وہ قریباً چالیس برس تک ندوہ کے کتب خانہ کی ترقی و تزئین کے لیے وقف رہے، لائبریری سائنس کی کسی مروجہ عصری سند کے بغیر انہوں نے جس طرح اس کتب خانہ کو ملک کا بہترین کتب خانہ بنایا وہ اپنی مثال آپ ہے، انہوں نے عرصہ تک ندوہ کے مدرسہ ثانویہ اور دارالاقامہ سلیمانیہ میں اتالیق و مربی کے فرائض بھی انجام دیے ندوہ اور مولانا سید ابوالحسن علی ندوی سے ان کو عشق تھا، ندوہ کے لیے انہوں نے کثرت سے سفر کئے، نہایت مرنجاں مرنج خوش اخلاق، ہنس مکھ اور خلیق و شفیق تھے دارالمصنفین سے بھی ان کو خاص تعلق تھا، سید صباح الدین عبدالرحمن مرحوم جب بابری مسجد مرتب کررہے تھے تو مولانا نے بڑی دلچسپی سے ان کو ضروری مخطوطات و کتابیں مہیا کیں جن کا اعتراف کتاب کے مقدمہ میں کیا گیا ہے، گزشتہ مہینہ جب دارالمصنفین میں رابطہ ادب اسلامی کے سمینار کا اعلان ہوا تو وہ اس میں شریک ہونے والے تھے، لیکن قضاو قدر نے اس سے پہلے ہی ان کو اپنے خالق حقیقی کے حضور میں بلالیا، اﷲ تعالیٰ پس ماندگان کو صبر جمیل اور مولانا مرحوم کو جنت الفردوس میں جگہ عطا فرمائے، آمین۔ (’’ع ۔ص‘‘، دسمبر ۱۹۹۵ء)