ابو ریحان
قارئین معارف نے ۱۲ـ؍ نومبر کو ہونے والے بھیانک ہوائی جہاز حادثے کی خبر اخباروں میں پڑھی ہوگی، اس حادثہ میں راقم کے خویش ابو ریحان بھی جاں بحق ہوگئے جو ایک صالح اور صوم و صلوٰۃ کے پابند نوجوان اور مولانا امین احسن اصلاحی مدظلہ صاحب تدبر قرآن کے پوتے تھے۔ ہزار ضبط کے باوجود میرا پیمانہ صبر لبریز ہوگیا اور اپنے ذاتی حادثہ کی اطلاع دینے کے لئے مجبور ہونا پڑا، مرحوم کی جسمانی یادگار تین بچیاں ہیں جو ابھی دس برس کی بھی نہیں ہیں۔ اﷲ تعالیٰ غریق رحمت کرے، معصوم بچیوں پر رحم فرمائے اور ان کے اور حادثہ میں ہلاک ہونے والے سب ہی لوگوں کے غم زدہ اعزہ کو صبر جمیل عطافرمائے، آمین! (ضیاء الدین اصلاحی، نومبر ۱۹۹۶ء)