سید غلام محی الدین
دوسرا حادثہ جناب سید غلام محی الدین کی وفات کا ہے، جو بڑے خاموش، متین، متواضع اور ذی علم شخص تھے۔ مولانا آزاد میموریل اکیڈمی لکھنؤ کے روح رواں اور اس کے انگریزی جرنل کے ایڈیٹر تھے، وہ مجلس تحقیقات و نشریات اسلام لکھنؤ کے بھی نہایت سرگرم رکن اور انگریزی کے اچھے اہل قلم تھے، مولانا سیدابوالحسن علی ندوی مدظلہ سے بڑا مخلصانہ تعلق رکھتے تھے، ان کے دینی و دعوتی کاموں میں ان کے معادن بھی تھے، ان کی متعدد کتابوں اور مضامین کا انگریزی ترجمہ کیا، مولانا ان کی خاموش خدمت اور علمی صلاحیت کے معترف تھے، عرصہ سے تنفس کا مرض لاحق ہوگیا تھا۔ بالاخر ۹؍ نومبر کو وقت موعود آگیا، اﷲ تعالیٰ ان کے درجات بلند فرمائے، آمین۔ (ضیاء الدین اصلاحی، دسمبر ۱۹۹۶ء)