امجد علی غزنوی
افسوس ہے کہ گزشتہ مہینے میں ہمارے ضلع اور شہر کے مشہور قومی کارکن، کامیاب وکیل اور اچھے شاعر جناب امجد علی غزنوی کا انتقال ہوگیا۔ انھیں اقبال سہیل اور مرزا احسان احمد سے مشورہ سخن کا شرف حاصل تھا۔ ان کے گھر پر اکثر نشستیں ہوتی تھیں اور انھوں نے بعض بڑے مشاعرے بھی کرائے۔ ان کا مجموعہ کلام ’’صہبائے خودی‘‘ بھی زیر کتابت تھا، تعلیمی کاموں سے بھی بڑی دلچسپی تھی۔ اپنے وطن محمدپور میں ایک دینی مدرسہ اور انٹر کالج ان کی یادگار ہے۔ شبلی کالج کی مجلس انتظامیہ کے ممبر اور ایک زمانے میں سینئر نائب صدر تھے۔ دارالمصنفین سے بھی تعلق تھا، یہاں برابر آتے تھے۔ مولانا مسعود علی ندوی کی سفارش پر کانگریس نے ۱۹۶۲؁ء میں انھیں ٹکٹ دیا تو صوبائی اسمبلی کے ممبر ہوئے۔ مگر اب سیاست کے گرے ہوئے معیار اور خود کانگریس کے رویے سے خوش نہیں رہتے تھے۔ بڑے باغ و بہار شخص تھے۔ دوسروں کی خدمت اور مصیبت زدہ لوگوں کی مدد کرکے خوش ہوتے تھے۔ قدرت نے انھیں دردمنددل اور بے چین طبیعت بخشی تھی۔ خود کہتے ہیں ؂
اک دل درد آشنا و اک نگاہِ حق نگر
اور کیا اس کے سوا امجدؔ سے دیوانے میں ہے
(ضیاء الدین اصلاحی، جنوری ۱۹۹۷ء)