ڈاکٹر وحید اختر
افسوس ہے مشہور شاعر و نقاد ڈاکٹر وحید اختر بھی وفات پاگئے، ان کی پیدائش اور ابتدائی تعلیم اورنگ آباد میں ہوئی۔ جامعہ عثمانیہ حیدر آباد سے فلسفہ میں ایم۔ اے اور پی۔ ایچ۔ ڈی کی پھر علی گڑھ مسلم یونیورسٹی آئے اور پروفیسر، صدر شعبہ فلسفہ اور ڈین ہوئے۔
خواجہ میر درد پر بہت کم کام ہوا ہے، ان کی کتاب ’’خواجہ میر درد۔ تصوف اور شاعری‘‘ سے اس کمی کی تلافی ہوگئی جس کی علمی و ادبی حلقوں میں بڑی پذیرائی ہوئی۔ فلسفہ، ادبی تنقید اور غالب وغیرہ پر انہوں نے جو کچھ لکھا ہے وہ قدر و قیمت کا حامل اور ان کے اچھے ادبی و تنقیدی ذوق کا ثبوت ہے۔ ڈاکٹر وحید اختر کے متعدد شعری مجموعے بھی شایع ہوئے ہیں، انہیں نظم و غزل دونوں پر قدرت تھی۔ ان کی شاعری مسائل عصر کی ترجمانی ہے۔
اﷲ تعالیٰ ان کی بشری لغزشوں سے درگزر فرمائے اور ان کے ساتھ رحم و مغفرت کا معاملہ فرمائے۔ (ضیاء الدین اصلاحی،جنوری ۱۹۹۷ء)