محمد فاروق نعمانی
افسوس ہے کہ ۲۶ و ۲۷؍ اپریل کی درمیانی شب میں جناب محمد فاروق نعمانی نے الٰہ آباد میں داعی اجل کو لبیک کہا، وہ مولانا شبلی کے برادر زادہ اور مولوی محمد اسحق صاحب وکیل ہائی کورٹ کے صاحبزادے تھے، جو اعظم گڑھ میں مولانا کے علمی و تعلیمی اور خاندانی جائداد اور زمینداری کے کاموں میں ان کے خاص دست و بازو تھے، ان کے انتقال پر مولانا نے ایسا پُر درد مرثیہ لکھا جو اردو کی عزائیہ شاعری میں بے مثال ہے، فاروق صاحب اس وقت کم سن تھے، اس کی طرف مولانا نے اس شعر میں اشارہ کیا ہے۔ ؂
لاڈلے ہیں کہ کسی اور کے بس کے بھی نہیں
اس کے بچے ابھی سات آٹھ برس کے بھی نہیں
فاروق صاحب شبلی کالج کے پرجوش اور سرگرم ممبر تھے، دارالمصنفین سے بھی ان کو گہرا اور جذباتی تعلق تھا، یہاں کی دعوتوں اور مجلسوں میں شریک رہتے، صوم و صلوٰۃ کے پابند تھے، لاگ لپیٹ ان کو نہیں آتا تھا۔ اﷲ تعالیٰ مغفرت فرمائے اور پس ماندگان کو صبر جمیل عطا کرے، آمین۔ (ضیاء الدین اصلاحی۔ مئی ۱۹۹۷ء)