ایم۔ حبیب خاں
یہ سطریں زیر تحریر تھیں کہ معلوم ہوا کہ جناب ایم حبیب خاں بھی رحلت فرماگئے وہ انجمن ترقی اردو ہند کے اسسٹنٹ سیکریٹری اور جناب خلیق انجم جنرل سیکریٹری کے دست راست تھے، نیک طبع اور شریف انسان تھے، جب بھی ملاقات ہوتی تو اپنے خلوص و محبت کا نقش دل پر بٹھا دیتے، دارالمصنفین سے بھی لگاؤ رکھتے، گزشتہ برس لکھنؤ میں ملاقات ہوئی تو دیر تک اس کے مسائل پر تبادلہ خیال کرتے رہے، مدت دراز سے انجمن سے وابستہ تھے، ادب و تنقید ان کا خاص موضوع تھا، اس پر ان کی کئی کتابیں چھپ چکی ہیں، ۶۴؍ ۶۵ برس عمر رہی ہوگی اور صحت اچھی تھی مگر دو ماہ قبل جگر کے کینسر کا عارضہ ہوا اور چل بسے اﷲ تعالیٰ اپنی رحمت کاملہ سے نوازے۔
(ضیاء الدین اصلاحی، مارچ ۱۹۹۸ء)