مولانا ابوبکر اصلاحی
افسوس ہے کہ ۲؍ مئی کو جماعت اسلامی کے ایک ذمہ دار بزرگ اور اعظم گڑھ کے اطراف کے مشہور عالم مولانا ابوبکر اصلاحی صاحب نے داعی اجل کو لبیک کہا، مدرسۃ الاصلاح سے فراغت کے بعد انہوں نے ضلع بستی میں دینی تعلیم کی اشاعت اور درس و تدریس کی خدمت انجام دی، ۴۶؁ء میں مدرسۃ الاصلاح آئے۔ راقم نے صرف و نحو اور فقہ کی بعض کتابیں ان سے پڑھیں، وہ جماعت کے بڑے سرگرم رکن تھے، اس لیے مدرسہ سے سبکدوش ہوکر اس کے تنظیمی کاموں میں لگ گئے، ان کی اچھی کارگزاری کی بنا پر جب جامعۃ الفلاح قائم ہوا تو اس کی ترقی و استحکام کا کام انہیں سپرد کیا گیا اور وہ عرصہ تک اس کے نیک نام ناظم و صدر مدرس رہے۔ اب علالت و معذوری کی وجہ سے سرائمیر میں اپنے گھر ہی رہتے تھے۔
دارالمصنفین بھی تشریف لاتے تھے، مولانا شاہ معین الدین احمد ندوی سے تعلق خاطر تھا۔ مولانا ابوبکر صاحب کی وفات سے جماعت اسلامی اپنے ایک اچھے اور مخلص کارکن سے محروم ہوگئی، اﷲ تعالیٰ مغفرت فرمائے اور پس ماندگان کو صبر جمیل عطا کرے۔ آمین! (ضیاء الدین اصلاحی، مئی ۱۹۹۸ء)