مولانا شاہ حسن مثنیٰ ندوی
یہ بھی پھلواری کے علمی و دینی خانوادے کے چشم و چراغ اورمولانا شاہ سلیمان پھلواروی کے پوتے تھے جو ہندوستان کے مشہور عالم و واعظ اور تحریک ندوۃ العلماء کے خاص رکن تھے، تقسیم کے بعد شاہ حسن مثنیٰ صاحب پاکستان چلے گئے اور وہاں سے مہرنیمروز کے نام سے ایک مذہبی و ادبی رسالہ نکالا، اس میں وہ ’’چہ دلاورست و زدے کہ بکف چراغ دار‘‘ کے عنوان سے ایک مستقل کالم لکھتے جس میں ادیبوں کی چوریوں کا ذکر ہوتا جو بہت پسند کیا جاتا، ادب سے ان کو بڑا شغف تھا اور ان کے ادبی و تنقیدی مضامین ان کے جوہر قابل ہونے کے غماز تھے۔ ان کا انتقال مارچ ہی میں ہوگیا تھا، لیکن پاکستان کی خبریں یہاں دیر سے پہنچتی ہیں، اﷲ تعالیٰ ان کو اپنی رحمت کاملہ سے نوازے، آمین! (ضیاء الدین اصلاحی، مئی ۱۹۹۸ء)