منشی محمد حنیف 
بمبئی کے خطوط سے منشی محمد حنیف صاحب کے انتقال کی خبر معلوم کرکے بڑا صدمہ ہوا، ان کی جوانی مدرسۃ الاصلاح سرائمیر کی خدمت میں گزری، پھر بمبئی گئے، اﷲ نے کاروبار میں بڑی برکت دی۔ ہر طرح کی فارغ البالی کے باوجود نہ دین سے شغف میں کمی آئی اور نہ مدرسۃ الاصلاح کی محبت میں فرق آیا۔ اس کی ترقی و فلاح کے لیے برابر فکرمند رہتے۔ دارالمصنفین سے بھی خاص لگاؤ تھا، اس کے لائف ممبر تھے، مولانا شاہ معین الدین احمد ندوی اور سید صباح الدین عبدالرحمن صاحب سے بڑے مخلصانہ روابط تھے، ان حضرات کی بمبئی اور اپنے گاؤں آندھی پور میں پر تکلف دعوتیں کرتے، مجھ پر بھی بڑی شفقت فرماتے۔ اب ایسے شریف، بامروت، وضع دار اور مخلص لوگ نایاب ہوتے جارہے ہیں، اﷲ تعالیٰ غریقِ رحمت کرے اور متعلقین و اعزہ کا غم زائل کرے!! (ضیاء الدین اصلاحی، مئی ۱۹۹۸ء)