مولانا افتخار احمد فریدی
دینی حلقوں میں یہ خبر افسوس اور رنج کے ساتھ سنی جائے گی کہ ۲۴؍ اکتوبر ۱۹۹۸؁ء کو ایک پُرجوش اور سرگرم داعی و مبلغ مولانا افتخار احمد فریدی انتقال فرماگئے، اناﷲ وانا الیہ راجعون۔
مرحوم کا وطن مراد آباد تھا، ایک زمانے میں ان کے ہاتھوں میں وہ پرچم بغاوت تھا جس کو سرفروشان وطن نے برطانوی جبر و استبداد کے خلاف بلند کیا تھا مگر پھر ع پھاڑ کر جیب و آستین کر علم جنوں بلند۔ انہیں حضرت مولانا محمد الیاسؒ کی دینی دعوت سے عشق ہوگیا جس کے لیے وہ ملکوں ملکوں کی خاک چھانتے رہے ، کسی حادثہ میں ان کا ایک پیر کاٹ دیا گیا مگر وہ بیساکھیوں کے سہارے ملک کے و طول و عرض کا دورہ کرتے رہے، سفر حج میں مولانا شاہ معین الدین احمد ندوی کا ساتھ ہوگیا تو ان کی بڑی خدمت کی اور ہر طرح کا آرام پہنچایا۔ ایک دفعہ وہ اپنے ایک تبلیغی دورے میں اعظم گڑھ آئے تو شاہ صاحب نے ان کی بڑی پذیرائی کی۔ جناب سید صباح الدین صاحب سے مخلصانہ تعلق رکھتے تھے اور راقم سے بھی خط و کتابت رہتی تھی۔
کئی برسوں سے تبلیغی دوڑ دھوپ کا سلسلہ موقوف ہوگیا تھا، لیکن اسی جذبے سے اصلاحی و دعوتی رسائل اور مواعظ و ملفوظات کے مجموعے شائع کرتے تھے، وہ غیر مسلموں میں بھی اسلام کی تبلیغ و اشاعت کرتے رہتے تھے۔ اﷲ تعالیٰ ان کی بشری لغزشوں سے درگزر فرمائے اور انہیں جنت نعیم میں جگہ دے۔ آمین! (ضیاء الدین اصلاحی، نومبر ۱۹۹۸ء)