ڈاکٹر محمد مصطفےٰ زرقاء
گزشتہ دنوں عالم عرب کے ممتاز ماہر فقہ ڈاکٹر محمد مصطفےٰ زرقاء نے بھی اس جہاں فانی کو خیر باد کہا، اناﷲ وانا الیہ راجعون۔
ڈاکٹر صاحب اسلامی فقہ وقانون میں سند کا درجہ رکھتے تھے، ان کی کتاب المدخل الفقھی العام اصول فقہ میں نہایت بلند پایہ خیال کی جاتی اور مرجع و ماخذ کی حیثیت رکھتی ہے، وہ اپنی غیر معمولی فقہی بصیرت کی بنا پر شام میں وزیر انصاف کے عہدہ پر بھی فائز ہوئے۔ ان کے عالمانہ و محققانہ مضامین کے اردو رسالوں میں ترجمے برابر چھپتے رہتے تھے معارف کو بھی ان کے مضامین کے ترجموں کی اشاعت کا فخر حاصل ہے۔ مجلہ البعث الاسلامی لکھنو میں ان کے متعدد مضامین شایع ہوئے ہیں۔ فقہ کے علاوہ دوسرے اسلامی علوم خصوصاً تفسیر و حدیث سے بھی ان کو خاص مناسبت تھی۔ الولدسرلابیہ کے مصداق ان کے فرزند ارجمند ڈاکٹر محمد انس زرقا بھی فقہ اسلامی کے ممتاز اسکالر ہیں جن کے بعض مضامین کا ترجمہ معارف میں شایع ہوچکا ہے۔ اﷲ تعالیٰ علم و دین کے اس خادم کی مغفرت فرمائے۔ آمین!! (عارف عمری، اگست ۱۹۹۹ء)