خلیل الرب
گزشتہ مہینے جناب خلیل الرب صاحب وفات پاگئے، وہ پھولپور (الٰہ آباد) کے رہنے والے تھے، محکمہ تعلیمات میں ملازم تھے، اس سلسلے میں اعظم گڑھ برسوں قیام رہا شبلی منزل برابر تشریف لاتے، اردو سے عشق تھا۔ ادب و تنقید پر چند کتابیں بھی لکھیں، یو پی اردو اکیڈمی اور مسلم یونیورسٹی کورٹ کے ممبر تھے، باغبانی اور چمن آرائی کا عمدہ ذوق تھا، دارالمصنفین کی گولڈن جوبلی کے موقع پر ان ہی نے چمن بندی کی تھی جس کو ڈاکٹر ذاکر حسین صاحب نے بہت پسند کیا تھا اور ان سے گلاب کی بعض قسمیں دہلی منگائی تھیں۔ اﷲ تعالیٰ مغفرت فرمائے۔ آمین!! (ضیاء الدین اصلاحی، اگست ۱۹۹۹ء)