میر مقصود علی خاں
یہ خبر بھی بڑے افسوس کے ساتھ سُنی جائے گی کہ بنگلور سے نکلنے والے روزنامہ سالار کے اڈیٹر و مالک جناب میر مقصود علی خان کی وفات ہوگئی۔ ایک زمانے میں سیاسی سرگرمیوں سے ان کا بڑا تعلق تھا۔ ریاستی اسمبلی کے دو بار رکن منتخب ہوئے، راجیہ سبھا کے ممبر بھی رہے۔ ۶۲؁ء میں نجلنگپا کی کابینہ میں وزیر ہوئے۔ لیکن اب ادب و صحافت کی جانب ان کی توجہ مرکوز ہوگئی تھی۔ وہ کرناٹک پتریکا اکادمی کے رکن تھے۔
دین سے طبعاً لگاؤ تھا۔ صوم و صلوٰۃ کے پابند تھے، مولانا علی میاں سے عقیدت تھی۔ دارلعلوم ندوۃ العلماء کی مجلس انتظامی کے رکن تھے، اس کے جلسوں میں ان سے برابر ملاقات رہتی، بڑی محبت اور خوش خلقی سے ملتے۔ دارلمصنفین اور معارف کے بڑے قدرداں تھے۔ یہ ان کے مطالعہ میں بھی رہتا تھا۔ اﷲ تعالیٰ غریقِ رحمت کرے اور پس ماندگان کو صبر جمیل عطا کرے۔ آمین!! (ضیاء الدین اصلاحی، ستمبر ۱۹۹۹ء)