ڈاکٹر عبدالسلام سلامؔ سندیلوی
افسوس ہے ۱۶؍ ستمبر کی شب میں معروف محقق و نقاد اور شاعر ڈاکٹر عبدالسلام سلامؔ سندیلوی کا انتقال ہوگیا، وہ ہردوئی ضلع کے مردم خیز قصبہ سندیلہ میں ۲۵؍ فروری ۱۹۱۹؁ء کو پیدا ہوئے تھے، لکھنؤ میں اعلیٰ تعلیم حاصل کی، ان کو اردو فارسی کے علاوہ ہندی اور سنسکرت پر بھی عبور تھا، اردو میں پی۔ایچ۔ڈی اور ڈی۔لٹ کی اور ہندی میں وشارد اور ساہتیہ سدھا کر کی ڈگریاں حاصل کیں، مضمون نگاری اور شعر و شاعری کا چسکا طالب علمی کے زمانے میں لگ گیا تھا، شعر و ادب اور تحقیق و تنقید ان کا خاص موضوع تھا، ان میں درجنوں تصنیفات یادگار چھوڑیں۔ اردو رباعیات، اردو شاعری میں نرگیست اور اردو شاعری میں منظر نگاری بڑی اہم تصانیف ہیں، اول الذکر پر پی۔ایچ۔ڈی اور ثانی الذکر پر ڈی۔لٹ کی ڈگری ملی، ۱۹۵۹؁ء میں گورکھ پور یونیورسٹی سے وابستہ ہوئے اور پھر یہیں کے ہوگئے۔ وظیفہ یاب ہونے کے بعد بھی قلم و قرطاس سے تعلق باقی رہا، مگر کئی برس سے بینائی چلی گئی تھی اس لئے معذور اور خانہ نشین ہوگئے تھے، ڈاکٹر صاحب کی تصنیفات کمیت و کیفیت کے لحاظ سے اہم تھیں، لیکن اعزاز اور عہدے کے لئے بھاگ دوڑ ان کو پسند نہ تھی، اس لئے ان کو خاطر خواہ شہرت نہیں ملی، اس سال ان جیسے مستحق کو اترپردیش اردو اکادمی کا مولانا ابوالکلام آزاد ایوارڈ دیا جانا قابل ستایش اقدام تھا، اﷲ تعالیٰ مغفرت فرمائے اور پس ماندگان کو صبر وقرار بخشے۔ آمین!! (ضیاء الدین اصلاحی، اکتوبر ۲۰۰۰ء)