پروفسیر نورالحسن ہاشمی
افسوس ہے کہ اردو کے بلند پایہ ادیب و محقق اور لکھنؤ یونیورسٹی کے سابق صدر شعبۂ اردوپروفیسر نورالحسن ہاشمی ۲۸؍ نومبر کو وفات پاگئے، اردو کے علاوہ ان کو ہندی، اودھی، انگریزی اور فارسی زبانوں پر بھی پوری دسترس تھی، اردو کی کئی کلاسیکل کتابیں تحقیق و تدوین کے بعد شائع کیں جن میں نوطرز مرصع، بکٹ کہانی، کلیات ولی اور قدیم روزنامچہ قابل ذکر ہیں، ان کی سب سے اہم علمی، ادبی اور تحقیقی کتاب ’’دلی کا دبستان شاعری‘‘ ہے، انہوں نے غالب کے کلام کا اودھی میں منظوم ترجمہ بھی کیا تھا اور ’’اندرونم‘‘ کے نام سے ان کا مجموعہ کلام بھی شائع ہوا تھا، مرحوم نیک اور خاموش طبع تھے اس لئے علمی قابلیت کے باوجود زیادہ شہرت نہیں حاصل کرسکے، اﷲ تعالیٰ غریق رحمت کرے، آمین۔ (ضیاء الدین اصلاحی، دسمبر ۲۰۰۰ء)