مولوی مفتی نسیم احمد قاسمی
یہ خبر سن کر بڑا افسوس ہوا کہ امارتِ شرعیہ بہار، جھارکنڈ اڑسیہ کے ناظم مولوی مفتی نسیم احمد قاسمی نے ۳۰؍ جنوری کو داعی اجل کو لبیک کہا، وہ مولانا قاضی مجاہد الاسلام کے خاص تربیت یافتہ تھے، فقہی اور ملی مسائل پر ان کے اچھے مضامین لوگوں کوان کی طرف متوجہ کررہے تھے، امارت کے کاموں میں بھی بڑے مستعد، کارگزار اور چاق چوبند رہتے تھے، ان کی وفات سے اسے بڑا دھکا پہنچا۔
ابھی ان کی عمر ۳۷ برس تھی، یہ بھی کوئی جانے کے دن تھے مگر مشیت ایزدی میں کس کو دخل ہے، اﷲ تعالیٰ مغفرت فرمائے، پس ماندگان کو صبر جمیل دے اور امارت کو ان کا بدل مہیا کرے، آمین۔ (ضیاء الدین اصلاحی۔ مارچ ۲۰۰۳ء)