مولانا سید شاہ رضوان اﷲ قادری مجیبی
افسوس ہے کہ خانقاہ مجیبیہ پھلواری شریف پٹنہ کے سجادہ نشین مولانا سید شاہ رضوان اﷲ قادری مجیبی ۳۱؍ دسمبر ۲۰۰۳؁ء کو وفات پاگئے، اِنا ﷲ وَاِنا اِلیہ رَاجِعونْ۔
ابھی عمر کی جس منزل میں وہ تھے، یہ جانے کے دن نہیں ہوتے لیکن مشیت الٰہی میں کس کا دخل؟ موت کا تو وقت مقرر ہے، فَاِذَا جَآءَ اجلُھُمْ لَا یستَأخِرُونْ سَاعۃ وَّلَا یستَقْدِمُوْنَ۔[الاعراف:۳۴]
خانقاہ مجیبیہ کا علمی و روحانی فیض مدت دراز سے جاری ہے، شاہ صاحب اس کی قدیم روایات اور اپنے عالی مقام اسلاف کی خصوصیات اور خوبیوں کے حامل تھے اور خود بھی ایک صاحب فیض عالم اور ذاکر و شاغل بزرگ تھے، ان کی ذات سے ہزاروں طالبین و سالکین فیض یاب ہورہے تھے مگر اب تزکیہ و اصلاح اور ارشاد کا یہ سرچشمہ بند ہوگیا۔
ان کو تقویٰ و اخلاص، صوم و صلوٰۃ کی پابندی، سادگی و درویشی اور خوش مزاجی و خوش خلقی ورثے میں ملی تھی، راقم کو دو تین بار ان کی خدمت میں حاضری اور ان کی پاکیزہ سیرت اور مطہر زندگی کے جلوے دیکھنے کا اتفاق ہوا، ہر بار نہایت خندہ پیشانی سے ملے اور لطف و کرم سے پیش آئے، اﷲ تعالیٰ ان کے درجات بلند کرے اور پس ماندگان کو صبر جمیل عطا کرے، آمین۔
(ضیاء الدین اصلاحی، فروری ۲۰۰۴ء)