مولانا مرغوب الرحمن
گزشتہ دنوں کا ایک بڑا مذہبی اور تعلیمی حادثہ، دارالعلوم دیوبند کے مہتمم مولانا مرغوب الرحمن کی وفات ہے، وہ ہمارے بزرگوں کی اس صف میں تھے جو اخلاص، تقویٰ، اﷲیت کی خوبیوں سے آراستہ تھی، اس کے ساتھ تدبیر اور نظم و نسق کی قوت میں بھی وہ ممتاز تھے، ان کی پیرانہ سالی اور امراض جسمانی کو دیکھا جائے تو حیرت ہوتی ہے کہ وہ دارالعلوم جیسے بڑے ادارے کے بارگراں کو کس طرح اٹھائے ہوئے تھے، اﷲ تعالیٰ اعلیٰ علیین میں جگہ دے اب ایسے بزرگوں کا نعم البدل تو کیا بدل بھی مشکل سے ملے گا۔ (جنوری ۲۰۱۱ء)