عہد اورنگ زیب کے محمد خان وامق سیالکوٹ کے پہلے اردو شاعر ہیں۔ وہ اپنے وقت کے اہم شاعر تھے۔ وامق وڈہرہ قوم کے کھتری تھے اور ان کو مسلمان کرنے کا فخر اس وقت کے جید عالم مولانا عبد اﷲچلپئی کو تھا جنہوں نے ان کا نام محمد خان رکھا۔ اشفاق نیاز تاریخِ سیالکوٹ میں آپ کے بارے رقمطراز ہیں:

آپ نہ صرف اعلی درجے کے شاعر تھے بلکہ ایک انشا پرداز بھی تھے اور یہی شہرت اور قابلیت انہیں دربارِ عالمگیر تک لے گئی۔ بادشاہ ان کا بہت قائل تھا بعد میں بادشاہ نے ان کے فن و ادب کی قدر کرتے ہوئے انہیں اخلاص خاں کے اعلیٰ خطاب سے سرفراز بھی فرمایا۔ آپ صاحبِ دیوان بھی تھے۔ اردو اور فارسی میں شاعری کرتے تھے مگر افسوس کہ باوجود سعی بسیار کے کلام مفقود ہے۔ (۱)

راقم الحروف بھی کوشش کے باوجود ان کا اردو کلام دریافت نہیں کر سکا۔تاریخِ سیالکوٹ کے مطابق آپ نے محمد شاہ کے عہد ۱۷۶۶ء میں سیالکوٹ میں وفات پائی۔(۲)

۱۔اشفاق نیاز‘ ’’تاریخِ سیالکوٹ‘‘ ‘ سیالکوٹ‘ سیالکوٹ ایڈورٹائزرز ‘ ۲۰۰۹ء، ص : ۲۹۳

۲۔           ایضاً‘ ص: ۲۹۴