عشق پیچہ سیالکوٹی(۱۸۹۵۔۱۸۰۱) عشق پیچہ تخلص ہے کہیں پیچہ بھی لاتے ہیں۔ فرید لاہوری کے شاگرد ہیں۔ ان کا قلمی دیوان ذخیرہ شیرانی پنجاب یونیورسٹی میں محفوظ ہے جس میں غزلیات کے علاوہ ایک وا سوخت‘ چند مناقب‘ مخمس اور رباعیات شامل ہیں۔

حافظ محمود شیرانی عشق پیچہ کے بارے میں یوں رقمطراز ہیں:

عشق پیچہ کے ہاں اگرچہ کوئی جدت اور بلند خیالی نظر نہیں آتی اور زبان کے عیب بھی پائے جاتے ہیں تاہم وہ اس دبستان کے جو دہلی اور لکھنؤ کے نام سے مشہور ہے ،ایک کامیاب مقلد ہیں۔ (۱۸)

عشق پیچہ کی شاعری میں زبان کے عیب ہونے کے باوجود شاعرانہ تعلّیٰ ،تلمیحات و محاورات کا استعمال جا بجا نظر آتا ہے۔ اس حوالے سے اشعار ملاحظہ ہوں:

پری زادوں کو حرزِ جاں ہے مطلع میرے دیواں کا                          ہر اک نقطہ ہے میرے شعر میں خاتم سلیماں کا             

لکھوں مضمون اگر میں اوس پہ اوس زلف پریشاں کا                       نہو شیرازہ روز حشر تک بھی میرے دیواں کا  (۱۹)

لکھوں اس پر اگر وصف عیانِ جانِ جاناں کا                  بیاض چشم عنقا ہر ورق ہو میرے دیواں کا    

یہ رویا میں کہ پائی ہو گئی سب آبرو میری                       خیال آیا جو کچھ بہتے ہوئے چاہِ زنخداں کا      

یہی ہے عشق پیچہ روز و شب اب التجا حق سے                 الجھ جاوے نہ ہرگز دل کسی انساں سے انساں کا               (۲۰)

روایتی اردو شاعری کا محبوب اپنے عاشق پرظلم و رستم کرتا رہا ہے۔ محبوب کی اپنے عاشق کا فریفتہ کرنے کے لیے مکارانہ چالیں بھی کلاسیکی اردو شاعری کا حصہ رہی ہیں۔ عشقِ مجازی روایتی شاعری کا ایک بڑا موضوع رہا ہے۔ عشق پیچہ نے بھی روایتی شعر کہے ہیں اس حوالے سے اشعار ملاحظہ ہوں:

طائر دل کو ملا دانہ سے صدمہ جال کا                              دھیان جب آیا پسِ مرگ اوس کی ترچھی چال کا           

دیتے تھے تشبیہ ہم مو سے میان یار کو                           غور سے دیکھا تو عکس آیا نظر اک بال کا        (۲۱)

عشق مجازی کے ساتھ ساتھ عشقِ اہل بیت بھی عشق پیچہ کی شاعری کا موضوع رہا ہے۔ اس حوالے سے شعر ملاحظہ ہوں:

عشق پیچہ فکر ہے دنیا نہ عقبیٰ کا مجھے                                میں سلامی ہوں دل و جان سے نبیؐ کی آل کا   

عشق پیچہ درِ فیاض جسے کہتے ہیں                    ہم نے ہرگز نہ بدونِ درِ حیدرؓ دیکھا               (۲۲)

کلاسیکی اردو شاعری کے محبوب کی بے وفائی کلاسیکی اردو شعرا کا ایک بڑا موضوع رہا ہے۔ عشق پیچہ نے بھی اپنے محبوب کے ظلم و ستم کے ساتھ ساتھ اس کی بے وفائی کا رونا رویا ہے۔ چند اشعار ملاحظہ ہوں:

ترے بلبل شیفتہ زار رہے ہم کسی اور سے ربط سخن نہ رہا                  یہ غضب ہے کہ ہم پہ وہ لطف و کرم ترا اوبت غنچہ دہن نہ رہا         

ٹوٹا رشتہ جاں تو الم سے چھٹے ہوئے گور میں جا کر کہیں گوشہ نشیں                    واں بھی دشت جنوں کا جو دخل ہوا کہیں نام کو تارکفن نہ رہا            (۲۳)

عشق پیچہ بھی اپنے محبوب کی نگاہ کے تیر سے زخمی ہوئے تھے                         انہیں بھی اپنے محبوب کے دیدار کی تڑپ رہتی تھی

اس حوالے سے چند اشعار ملاحظہ ہوں:

تیر کا زخمی نہیں ہوں اور نہ ہوں تلوار کا                       میں فقط گھائل ہوں اوس کے ابروئے خمدارکا              

ذوق بلبل کو رہے ہر دم گل و گلزار کا                             اور مجھے ہے شوق یارو یار کے دیدار کا            (۲۴)

محبوب کی یاد بھی روایتی اردو شاعری کا موضوع رہا ہے۔ عشق پیچہ کی غزل میں بھی یہ مضمون دیکھا جا سکتا ہے۔ چند اشعار ملاحظہ ہوں:

پہلوئے یار میں اغیار نے سونے نہ دیا                            پاس گل کے ہمیں اس خار نے سونے نہ دیا   

کسی کی یاد آئی مجھے شب کو بتائے رنگیں                         تا سحر دیدہ خونباز نے سونے نہ دیا

بعد مرنے کے بھی افسوس رہیں وا آنکھیں                    یاد آئینہ رخسار نے سونے نہ دیا    (۲۵)

عشق پیچہ نے اپنے محبوب کا سراپا بھی خوبصورت انداز میں پیش کیا ہے۔ غالب کی طرح عشق پیچہ نے بھی اپنے محبوب کے قد و قامت کی تعریف کی ہے:

گلشنِ دہر میں ہر ایک صنوبر دیکھا                 پر نہ تیرے قدِ موزوں کے برابر دیکھا          (۲۶)

میر تقی میر کی طرح عشق پیچہ بھی عشق و عاشقی میں درد و غم سے دو چار ہوئے اور محبوب کی طرف سے ڈھائے جانے والے ظلم و ستم کا سامنا ایک صابر عاشق کی طرح کیا:

دردواندوہ وَستم نالہ و شب بیداری                               جو نہ دیکھا تو ترے غم میں سِتم گر دیکھا          (۲۷)

عالمی شاعری میں اخلاقیات ایک اہم موضوع رہا ہے۔ عشق پیچہ بھی اپنی شاعری میں اخلاقیات کا درس دیتے نظر آتے ہیں۔وہ خلوص امن اور پیارو محبت کے شاعر ہیں۔ وہ دوستی میں مفاد کے قائل نہیں بلکہ بے لوث دوستی کا درس دیتے ہیں۔ بطور انسان انہیں بھی فریب و دھوکہ سے دوچار ہونا پڑا تو وہ پکار اٹھے۔

دوست سمجھا جسے اوس نے مجھے دشمن سمجھا                   رہ دکھایا جسے اوس نے مجھے رہزن سمجھا        

یہی ہے عشق پیجہ روز و شب اب التجا حق سے                 الجھ جاوے نہ ہرگز دل کسی انسان سے انساں کا               (۲۸)

حسن و عشق اور جمالیات بھی عشق پیچہ کی غزلیہ شاعری کا موضوع ہے۔ وہ اپنی شاعری میں جمال پرست نظر آتے ہیں۔ ان کے ایک شعر سے ان کی جمالیاتی حِس کا جائزہ لیا جا سکتا ہے۔

باز آیا نہ پری زادوں کو ملنے سے ذرا                               مجھ سے غم خوار کو دل نے میرے دشمن سمجھا               (۲۹)

عشق پیچہ کی شاعری کی زبان سادہ ہے۔ روزمرہ اور محاورات کا استعمال بھی ہے۔ عشق پیچہ نے اپنی شاعری میں بہت سے ایسے الفاظ بھی استعمال کئے ہیں جو اب متروک ہو چکے ہیں۔

۱۸۔         خورشید احمد خان یوسفی‘ ’’پنجاب کے قدیم اردو شعراء‘‘ اسلام آباد‘ مقتدرہ قومی زبان ‘ ۱۹۹۶ء ‘ ص: ۲۶۸

۱۹۔          ایضاً،ص : ۲۶۸

۲۰۔        ایضاً ‘ ص: ۲۶۹‘ ۲۷۰

۲۱۔         ایضاً ‘ ص: ۲۷۱

۲۲۔ ایضاً ‘ ص: ۲۷۲

۲۳۔ ایضاً ‘ ص: ۲۷۳

۲۴۔ ایضاً ‘ ص: ۲۷۵

۲۵۔        ایضاً ‘ ص: ۲۷۶

۲۶۔         ایضاً ‘ ص: ۲۷۶

۲۸۔        ایضاً ‘ ص: ۲۷۵