مولوی محمد فیروز الدین ڈسکوی (۱۹۰۷۔۱۸۲۴) کا عرصہ حیات انیسویں صدی کے نصف آخر اور بیسویں صدی کے پہلے عشرے پر مشتمل ہے۔ وہ بیک وقت مفسر قرآن مجید‘ قواعد نویس‘ لغات نویس‘ سیرت و سوانح نگار‘ معلم‘ مذہبی عالم اور اردو پنجابی کے قادر الکلام شاعر تھے۔ آپ سیالکوٹ کی تحصیل ڈسکہ کے محلہ ٹھٹھیاراں میں پیدا ہوئے۔(۳۲) مولوی فیروز الدین انجمن حمایتِ اسلام کے سرگرم کارکن تھے۔ اکثر انجمن کے جلسوں میں شریک ہوتے۔ ماہانہ چندہ دیتے۔ انجمن کے تیسرے سالانہ جلسے‘ منعقدہ 25تا 27 فروری 1888ء میں سیالکوٹ سے جو لوگ شریک ہوئے ان میں مولوی صاحب موصوف ‘ شیخ محمد اقبال (علامہ اقبال جوان دنوں سکاچ مشن کے طالب علم تھے) کے علاوہ دیگر اصحاب بھی شامل تھے۔(۳۳)

 مولوی صاحب انجمن کے جلسوں میں نظمیں بھی پڑھا کرتے تھے۔ مئی 1894ء میں انہوں نے نظم ’’مسدس اصلاح قوم کی تحریک‘‘ جلسے میں سنائی۔ نظم کے چھتیس بند تھے۔ نظم جون 1894ء کے شمارے میں شائع بھی ہوئی۔(۳۴)

انجمن کے تیسرے سالانہ جلسے منعقدہ 24تا 27فروری 1888ء میں بھی انہوں نے ایک نظم سنائی جس کا پہلا بند یہ تھا:۔

کیوں نہ ہو آج گلستاں شاداب                     ہوں نہ گلہائے بوستاں شاداب   

کیوں نہ ہو گلشن جہاں شاداب                     ہو نہ فرحت سے باغباں شاداب 

جلسہ ہے انجمن کا سالانہ                              دور ہے اس چمن کا سالانہ             (۳۵)

 مولوی فیروز الدین ڈسکوی رفاہی کاموں میں بھی حصہ لیتے تھے۔ سیالکوٹ میں آپ نے انجمن اسلامیہ کی بنیاد ڈالی جس کی زیرِ نگرانی بعد میں تعلیمی ادارے بھی قائم ہوئے۔(۳۶) انجمن اسلامیہ سیالکوٹ کا قیام 1890ء کے اوائل میں ہوا۔1894ء میں انجمن اسلامیہ سیالکوٹ نے سرسید اور مولوی نذیر احمد کی آمد کے انتظامات کئے لیکن وہ سیالکوٹ نہ آ سکے(۳۷)

مولوی فیروز الدین ڈسکوی قادر الکلام شاعر تھے اور فیروز تخلص کرتے۔ وہ غزل اور نظم کے روایتی شاعر نہیں تھے۔ انہوں نے شاعری کو تبلیغی وسیلے کے طور پر اختیار کیا:

ان کے تبلیغی جذبے نے ان کو شعر گوئی کی طرف ہی مائل رکھا۔ اس طرح زیادہ سے زیادہ لوگ ان کی باتوں کو سمجھ کر راہ دین روشن کر سکتے تھے۔(۳۸)

انہوں نے گل و بلبل‘ شراب و شباب‘ شہوت اور شمع و شب کے تذکروں سے اپنے قلم کو آلودہ نہیں کیا بلکہ حمد و نعت قرآن اور اسلام کی عظمت بیان کر کے ’’شاعری جزویست از پیغمبری‘‘ کا حق ادا کیا۔ مولوی صاحب صرف عالمِ دین ہی نہ تھے بلکہ صاحب عشق بھی تھے۔ ان کا محبوب شاعروں کا روایتی محبوب نہیں جو اپنے چاہنے والوں کو ذلت سے آشنا کرتا ہے۔ ان کا محبوب وہ ہے جو اپنے چاہنے والوں کو دنیاوی محبوب سے بے نیاز بلکہ بیزار کر دیتا ہے۔ ان کی حمدیہ مخمس کا ایک بند ملاحظہ ہو:

جب سے اس مہوش کو دیکھا‘ کچھ نہ عقل و ہوش ہے                    بادۂ الفت سے دل اپنا میرا مدہوش ہے

ساقی قدرت سے بے بس آواز نوشانوش ہے                 اس پیارے حسن کا دل میں ہمارے جوش ہے

مت کرو کچھ ذکر ہم سے ترُک یا تاتار کا (۳۹)

مولوی فیروز الدین نے کم و بیش اپنی پچاس فیصد تصانیف کا آغاز منظوم حمد سے کیا ہے۔ ’’پیارے نبیؐ کے پیارے حالات‘‘ کا آغاز ان اشعار سے ہوتا ہے:

سب سے پہلے خدا کی حمد و ثنا                        جس نے سارا جہاں کیا پیدا         

مہر و ماہ اور سارے ارض و سما                        اک نمونہ ہے اس کی قدرت کا   

کرتی رہتی ہے صنعت باری                         باغ عالم کی کیا ہی گلکاری؟          

جب سے پھونکی ہے روح آدم میں                                شور ’’قالو بلیٰ‘‘ ہے عالم میں        (۴۰)

چند اور حمدیہ اشعار ملاحظہ ہوں:

مولا کریم! تجھ سا کوئی دوسرا نہیں                یاور نہیں‘ رفیق نہیں‘ آسرا نہیں            

تو نے عطا کیا ہے ہمیں خلعت وجود                                وہ کون ہے؟ سدا تیری جس پر عطا نہیں       

ہر برگ و گل‘ زباں ہے تیرے وصف میں سدا                           غنچہ ہے کونسا؟ جو زباں کھولتا نہیں               

ہے ذرہ ذرہ حکم میں تیرے لگا ہوا                 وہ کون ہے؟ جو کام میں تیرے لگا نہیں         (۴۱)

جہاں انہوں نے اﷲ جل شانہ کی صفات کے نغمے گائے ہیں وہاں مناجات کے ذریعے التجائیں بھی کی ہیں:

ہم مانگتے ہیں تجھ سے شب و روز یہ دعا                           اس کے سوا کوئی التجا نہیں           

اپنے رسولؐ کی ہمیں راہ پر چلائیو                   گم ہو گیا جو راہِ نبیؐ پر چلا نہیں       

فیروزی ہم کو دونوں جہاں میں نصیب ہو                       فیروز کی دعا‘ کوئی اس کے سوا نہیں            

وہ کام ہم سے ہوں‘ کہ کرے تو انہیں پسند                  ایسا نہ کام ہو‘ تیری جس میں رضا نہیں       

تیری محبت اس کو سراسر نصیب ہو                              فیروزؔ کچھ جہاں سے اور مانگتا نہیں (۴۲)

یہ کیسے ممکن ہے کہ مولوی صاحب حمد و مناجات تو لکھتے لیکن نعت کہنے کی سعادت حاصل نہ کرتے۔ وہ تو مناجات میں بھی اﷲ سینعت کہنے کا سلیقہ مانگتے ہیں۔ انہیں اس بات کا احساس ہے کہ وہ بہترین لفظوں کے انتخاب کے باوجود بھی نعت کہنے کا حق ادا نہیں کر سکتے۔ ذیل کے قطعے میں اسی بات کا اظہار یوں کرتے ہیں:

کیونکر ہو ثنائے ذات سرمد تحریر                  کس طرح ہو نعت پاک احمد تحریر

فیروز یہ منزل ہے بعید اس کو چھوڑ                               بہتر ہے کہ کیجئے اپنا مقصد تحریر    (۴۳)

ایک نعتیہ مسدس سے نمونہ ملاحظہ ہو:

وہ تو سچا مثل موسیٰ تھا                  جو جو اس کے خلاف میں اٹھا       

اس کو پکڑا خدا نے پر پکڑا                            پھر جہاں میں ملا نہ اس کا پتہ        

وہ نبیؐ اِک خدا کی قوت تھی                         سامنے آئے کس کو جرات تھی؟ 

ہاتھ اﷲ کا تھا دستِ نبیؐ                                جس کی ہیبت جہان پر چھائی        

وہ بلاشبہ حق کی قوت تھی                            ٹھہرا جس کے نہ سامنے کوئی       

ٹھہرے کب حق کے سامنے باطل                               ’’جاء الحق و زھق الباطل‘‘          (۴۴)

قرآن پاک اﷲ تعالی کی وہ کتاب ہے۔ جو علوم کا مخزن ہے۔ اس زندہ جاوید معجزے کی تعریف مولوی صاحب اس طرح کرتے ہیں:

واہ وہ عظمت کلامِ خدا                 پست ہیں اس کے آگے سب عقلا

ہے فصاحت کا سربسر شہرہ                          اور ملاحت کا گھر بہ گھر چرچا         

روح انسانی کا مربی ہے                کیا ہی شانِ کلامِ ربی ہے             

گنگ ہیں اس کے آگے سب عقلا                 کم زباں اس کے آگے سب حکما  

طفل مکتب فلاسفر سارے                           ہے یہ خورشید اور وہ تارے        

اس کا دعویٰ ہر اک دلیل کے ساتھ                             اور ِاک شوکت جلیل کے ساتھ  

ہے جو اس کے بیان میں تکمیل                    کیا ہے توریت اور کیا انجیل؟      

یہ حقائق کا اِک سمندر ہے                           ہر صداقت بس اس کے اندر ہے

اس کی فیروزؔ کیا کرے تعریف                     سر بسر ہے وہ لائق تعریف          (۴۵)

مولوی فیروز الدین کا زیادہ شعری سرمایہ قرآن کے ترجمے پر مشتمل ہے اس زمانے میں پنجابی زبان میں قرآن مجید کا ترجمہ نہیں تھا۔ مولوی صاحب موصوف نے اس کام کا بیڑا اٹھایا مگر وہ کچھ پاروں اور چند سورتوں کا منظوم ترجمہ ہی کر پائے۔ انہوں نے اُردو نظم میں قرآن مجید کی متفرق سورتوں کا ترجمہ کیا۔ ان کی شاعری میں سادگی اور سلاست نمایاں خصوصیات ہیں۔ الفاظ اور بیان کی سادگی سہل ممتنع کی حدوں کو چھوتی ہوئی نظر آتی ہے ان کے ہاں سادگی بھی ہے اور پرکاری بھی۔ مولوی صاحب قرآن کا ترجمہ کرنے میں ید طولیٰ رکھتے ہیں ۔انہوں نے سورۂ و الضحیٰ کا منظوم ترجمہ کیا تو انجمنِ حمایتِ اسلام کے ماہنامہ مجلہ کے ایڈیٹر نے ان الفاظ میں تبصرہ کیا:

مولوی صاحب کے ترجمہ کا طرزِ بیان عجب قسم کا لطیف اور عبارت اعلی درجہ کی فصیح اور بلیغ ہے۔ ترجمہ باوجود کہ نظم میں ہے لیکن ممکن نہیں کہ سورہ شریف مذکور کے کسی لفظ کے معنی یا مضمون چھوٹ گیا ہو۔ (۴۶)

مولوی فیروز الدین کا ترجمہ دیکھ کر اندازہ ہوتا ہے کہ انہوں نے کتنی سہولت کے ساتھ ترجمہ کیا ہے۔ ان کے ترجمے میں وہی روانی ہے جو اقبال کے ’’ساقی نامے‘‘ میں ہے۔ سورہ مزمل کی چند آیات کا منظوم ترجمہ ملاحظہ ہو:

اے وہ جو ہے کمبل کو اوڑھے ہوئے                             مرے واسطے سکھ کو چھوڑے ہوئے            

تو ہر رات اٹھ کر کیا کر قیام                          نہ کر دے مگر رات اس میں تمام 

تہجد میں قرآن کو خوب پڑھ                        بہ صورت خوش و لحن مرغوب پڑھ             (۴۷)

سورہ فاتحہ کا منظوم ترجمہ ملاحظہ ہو:

خدا ہی کو زیبا ہیں سب خوبیاں                      جو ہے ایک پروردگار جہاں        

وہ رحمن ہے اور نہایت رحیم                        ہے دارین میں اس کی رحمت عظیم              

قیامت کے دن کا ہے مالک وہی                    جو دے گا جزا سب کو اعمال کی    

تجھی کو ہیں ہم پوجتے اے خدا                     تجھی سے مدد مانگتے ہیں سدا        

دکھا ہم کو یا رب وہ رہِ مستقیم                         ہمیں راہِ حق پر چلا اے کریم       

تو ان پاک لوگوں کا رستہ دکھا                      کہ جن پر سدا فضل تیرا ہوا        

نہ ان کا ہو جن پہ نازل غضب                      نہ گمراہوں کی رہ دکھا میرے رب              

ہماری دعا کر قبول اے خدا                          ترے بن نہیں کوئی سنتا دعا          (۴۸)

مولانا ڈسکوی کو واقعہ نگاری میں کمال حاصل ہے۔ وہ واقعے کی جزئیات کو بھی پیشِ نظر رکھتے ہیں اور اختصار کو بھی۔ حضرت زیدؓ بن حارث کے حضرت زینبؓ کو طلاق دینے کا واقعہ ملاحظہ ہو:

کچھ عرصہ تک تو ان میں رہی واں موافقت                   بیزار زیدؓ سے ہوئی زینبؓ ذرا نہیں               

زوجہ اور زوج میں پھر اتفاق سے                  پہلا جو اتفاق تھا باہم رہا نہیں       

آخر کو ہوئی دونوں میں یاں تک مخالفت                        اک دوسرے کو چاہتا تھا دیکھنا نہیں             

شاکی جو ہوتا زیدؓ رسولؐ امین پاس                 ہو سکتا میرا اس کا نباہ مطلقا نہیں   

’’امسک علیک زوجک‘‘ کہتے اسے نبیؐ                           اﷲ سے ڈر کہ چھوڑنا ہرگز بھلا نہیں             

کچھ دن تو اور صبر کیا زیدؓ نے مگر                   آخر کو اس میں جب کہ رہا حوصلہ نہیں         

زینبؓ کو دی طلاق بس اِک روز زیدؓ نے                        حضرتؐ نے جب سنا‘ کہا اچھا کیا نہیں           (۴۹)

مولوی فیروز الدین بنیادی طور پر مبلغ تھے۔ تبلیغ میں وہ انداز بیان اختیار کیا جاتا ہے جو مخاطب کی ذہنی استعداد کے مطابق ہو۔ مولوی صاحب کے مخاطب کم پڑھے لکھے عوام تھے۔ انہوں نے اپنے قاری کی ذہنی استعداد کو سامنے رکھتے ہوئے آسان الفاظ کا استعمال کیا ہے۔ وہ فلسفیانہ مسائل کو بھی نہایت آسان الفاظ میں بیان کرنے کا گرُ جانتے ہیں۔

عیسائیوں کے عقیدہ تثلیـث کا رد ملاحظہ کریں:

بیٹا خدا کا کہتے ہو جب تم مسیح کو                     مریم کو کیا کہو گے؟ تمہیں کچھ حیا نہیں         

پیدا ہوا تھا باپ سے بیٹا‘ عجب ہے یہ                           پوتے سے پھر ہو بیٹا‘ کبھی یہ ہوا نہیں         

حضرت مسیح عجز سے تھے مانگتے دعا                               جو خود خدا ہو وہ تو دعا مانگتا نہیں    

کہتے ہو اس مسیح کو ابنِ خدا ہے وہ                  جو موت کے بھی ہاتھ سے آخر بچا نہیں        

عیسائیو! تمہاری عقیدت میں ایسے کیوں؟                     پردہ اگر تمہاری خرد پر پڑا نہیں    (۵۰)

مولوی فیروز الدین نے اپنے اشعار میں قرآنی آیات اور احادیث کو بھی تضمین کیا ہے:

قدرتیں ہیں اس کی عیاں ہر سو                    اَلذی لاالہِٰ اِلاّ ھُو       

کہہ رہا ہے یہی ہر اِک ذرہ                            اشہد اَلاّ اِلہٰ اِلا اﷲ       (۵۱)

وہ قطعات تاریخ کہنے میں بھی مہارت رکھتے تھے۔ اپنے سسر میاں حسام الدین کی وفات پر مندرجہ ذیل قطعہ تاریخ کہا:

چواز دار دنیا برفت آں ولی                          بگفتا چنیں روح اور غفرلی

مولوی فیروز الدین نے جہاں شعر کے مفہوم 1320 کو آسان سے الفاظ میں پیش کیا ہے۔ وہاں انہوں نے شعر کو پرتاثیر بنانے کے لیے علمِ بیان اور علمِ بدیع کو بھی استعمال کیا ہے لیکن ان شعری وسائل کے استعمال سے شعر کا مفہوم اور سادگی متاثر نہیں ہوئی بلکہ شعر کا خوشگوار تاثر اور گہرا ہوا ہے۔صنعتِ ترصیع کی ایک مثال ملاحظہ ہو:

نام تیرا ہے زندگی میری                             کام میرا ہے بندگی تیری              (۵۲)

مولوی صاحب نے اپنے دوست مولانا ابوالمنصور وفا دہلوی کی وفات پر جو مرثیہ لکھا وہ علمِ بیان اور علمِ بدیع کے استعمال کی عمدہ مثال ہے۔

32-         Pj Thr' ztr 1905 ,  .2414

۳۳۔ رسالہ ’’انجمنِ حمایت اسلام‘‘ اپریل ۱۸۸۸ء ص : ۱۹

۳۴۔        ایضاً ،جون ۱۸۹۴ء، ص :۱۹

۳۵۔        ایضاً ،اپریل ۱۸۸۸ء ، ص :۷۰

۳۶۔        ’’ تحقیقی زاویے‘‘ ص: ۲۵۸

۳۷۔        ڈاکٹر سلطان محمود حسین،’’اقبال کی ابتدائی زندگی‘‘ لاہور‘ اقبال اکادمی،۱۹۸۶ء، ص : ۴۷

۳۸۔        ’’ تاریخِ ادیبات مسلمانان پاک و ہند، تیرہویں جلد، ص :۴۰۷

۳۹۔         مولوی فیروز الدین ڈسکوی، ’’پیارے نبیؐ کے پیارے حالات‘‘ جلد دوم، سیالکوٹ‘ مفید عام پریس ،باراول، ۱۳۱۸ھ، ص:۲

۴۰۔        ایضاً ‘ جلد اول،ص :۲

۴۱۔         مولوی فیروز الدین ڈسکوی، ’’اسلام فی ذکر خیر الانام،جلد اول، ص ۱،۲،۳،۵

۴۲۔        ایضاً ‘ ص:۹ ‘ ۱۰

۴۳۔ مولوی فیروز الدین’’ پچاس مذہبی سوالات کے جواب‘‘ ،ص:۱

۴۴۔        ’’ رسالہ انجمنِ حمایتِ اسلام‘‘ جون ۱۸۹۴ء ،ص : ۶

۴۵۔        مولوی فیروز الدین،’’پیارے نبیؐ کے پیارے حالات‘‘ ، ص: ۸

۴۶۔        ’’رسالہ انجمنِ حمایتِ اسلام‘‘ فروری مارچ ۱۹۹۲ء،ص :۳

۴۷۔        انوار الاسلام، (ماہنامہ) جون ۱۹۰۲ء، ص:۳

۴۸۔        مولوی فیروز الدین ،’’پنج گنج الہیٰ‘‘ ‘ سیالکوٹ، پنجاب پریس، بار دوم ۱۹۰۶ء، ص :۴

۴۹۔         مولوی فیروز الدین ڈسکوی ،’’ ایک سچے آریہ کی مناجات ‘سیالکوٹ مفید عام پریس، بار اول،۱۸۹۷ء،ص:۱۵ ‘ ۱۶

۵۰۔        ایضاً ‘ ص:۷۰

۵۱۔         مولوی فیروز الدین، ’’پیارے نبیؐ کے پیارے حالات‘‘ ، ص: ۶

۵۲۔        ایضاً،ص:۳