حکیم شیر محمد شیر(۱۸۷۴۔۱۹۶۰) داغ دہلوی کے شاگرد اور لسان الاعجاز پنڈت میلا رام وفا کے استاد گرامی تھے۔ اقبال کی طرح آپ بھی خط و کتابت کے ذریعے مرزا خاں داغ دہلوی سے شاعری میں اصلاح لیتے تھے۔ داغ کی وفات کے بعد آپ نے سید احمد حسن میرٹھی کو اپنا کلام دکھانا شروع کر دیا۔ آپ کا کلام ہندوستان کے معروف رسائل میں چھپتا رہا۔ تین ضخیم دیوان لکھے مگر انہیں غربت کی وجہ سے شائع نہ کروا سکے۔ (۱۵۷) شیر نے غزلیں بہت کم لکھی ہیں۔ نظم‘ قصیدہ‘ مرثیہ‘ سلام اور صنف تاریخ کو تو وہ بچوں کا کھیل خیال کرتے تھے۔ بہت کوشش کے باوجود شیر کے مسودات دریافت نہیں ہو سکے۔ ’’سرزمینِ ظفر وال‘‘ کے تذکرے کے ذریعے راقم الحروف نے شیر کا کچھ کلام بازیاب کیا ہے۔ آپ نے اپنی ساری زندگی اپنے آبائی وطن ظفر وال(سیالکوٹ) میں گزاری۔ آپ کے کلام میں دیگر موضوعات کے ساتھ ساتھ مقامیت کے عناصر دیکھے جا سکتے ہیں۔ اس حوالے سے ان کی نظم ’’قصبہ ظفر وال‘‘ ملاحظہ کی جا سکتی ہے۔ اس نظم میں مقامیت کے ساتھ ساتھ ماضی و حال‘ تقسیمِ ہند اور ہندوستانی تہواروں کا ذکر بھی ملتا ہے۔ اس نظم کی زبان بہت سادہ اور سلیس ہے کچھ اشعار ملاحظہ ہوں:

اب ظفر وال ہے شکستہ حال                        آ گیا ہے اس آئینہ میں بال

رہ گیا ہے صرف عکس مو اس میں                 خوبیاں ہیں نہ خوبرو اس میں

چشمہ مہر میں وہ آب نہیں                            خم گردوں میں وہ شراب نہیں

وہ زمیں اب وہ آسمان نہ رہا                          ہم نے دیکھا تو جو سماں نہ رہا

حسنِ شہری سے یہ جا محروم                          اکثر اوقات بولتا ہے بوم

رہ گیا ماند قصبہ جاتی حسن                             ملگجا ہے کچھ دیہاتی حسن

نہیں سیپوں میں وہ در خوشاب                     قلزم حسن رہ گیا تالاب

عشق و حسن میں وہ جنگ نہیں                     راس لیلا و راگ رنگ نہیں

آہ پژمردگی کا پہرہ ہے                               بزمِ چہلم نہ ایک جا عاشور

اب تو رونق کی رہ گئی ہے یاد                         روح پرور کوئی بہار نہیں

منفعت بخش روزگار نہیں (۱۵۸)

عاجزی و انکساری‘ ویرانی‘ کمزوری و بڑھاپا‘ رفیقہ حیات سے محبت‘ تخیل پروانہ‘ جمال پرستی‘ عیش و عشرت ‘ بے خودی اور دنیا سے بیگانگی جیسے موضوعات ان کی شاعری میں کثرت سے ملتے ہیں۔ اس حوالہ سے کچھ اشعار ملاحظہ ہوں:

اس قصبہ میں ہے مکاں میرا                        سونا سونا سا ہے جہاں میرا           

بھوکی ننگی دکان بزازی کی                             جس میں بیمار سی طبابت بھی        

عہد پیری ہے ضعف طاری ہے                   سر پر کوہ کرایہ داری ہے            

آب و دانہ ہے غار کے اندر                          جی رہا ہوں مزار کے اندر           

شکل و صورت ذرا نہیں پائی                         پھر بھی یوسف سمجھتے ہیں بھائی     

ایک بندی ہے بس رفیقہ حیات                    میری دنیا میں بس اس کی کائنات

دل سے دل یوں ملا کر شادا شاد                     بیچ آیا نہ رشتۂ اولاد    

دونوں باہم تو گھر یہاں آباد                         ہُو کا عالم وگرنہ ہُو کی یاد              

نام گُم ہو گیا درندوں میں                            ہے تخیل مرا پرندوں میں         

پھر بھی کثرت سے ہے خیال مرا                 پھر بھی آزاد ہے خیال مرا          

زندگی ہے مرے خیالوں میں                      اور نگاہیں ہیں خوش جمالوں میں  

بے خودی شیوہ طبیعت ہے                          عیش اے شیرؔ میری فطرت ہے  (۱۵۹)