میلا رام وفاؔ (۱۸۹۵۔۱۹۸۰ء) ظفر وال کے گاؤں دیپو کے میں پیدا ہوئے۔ طالب علمی کے زمانے میں ہی شاعری کا شوق تھا۔ ان دنوں ظفر وال میں قریشی ثناء اﷲ اور شیر محمد شیر کے ادبی معر کے زوروں پر تھے۔ آپ نے شیر صاحب کے سامنے زانوئے تلمذتہہ کیا اور ابتدائی کلام پر اصلاح لینی شروع کی۔ لیکن یہ سلسلہ زیادہ دیر تک قائم نہ رہا اور آپ روزگار کی تلاش میں لاہور چلے گئے۔

گو میں رہا رہین ستم ہائے روزگار                   لیکن ترے خیال سے غافل نہیں رہا

 کے مصداق آپ نے لاہور میں داغ دہلوی کے شاگرد راج نرائن ارمان دہلوی سے اصلاح لینی شروع کر دی۔(۲۴۶)آتش کشمیری اپنی کتاب ’’سرزمینِ ظفر وال‘‘ میں میلا رام وفا کے بارے میں کہتے ہیں:

آپ نے لاہور میں داغ دہلوی کے شاگرد راج نرائن ارمان دہلوی سے اصلاح لی اور ان سے بہت استفادہ کیا۔ استاد کی ہمراہی میں بہت سے مشاعروں میں جانے کا موقع بھی ملا اور آپ کا کلام اردو رسائل میں چھپنا شروع ہو گیا۔ زیادہ عرصہ نہیں گزرا تھا کہ آپ مشہور شعراکے پہلو بہ پہلو چلنے لگے۔ آپ روزنامہ ’’ہندوستان‘‘ کے نائب مدیر اور روزنامہ ’’ویر بھارت‘‘ کے مدیرِ اعلی کے عہدے پر بھی فائز ہوئے۔ تقسیمِ ملک کے بعد آپ اس عزم سے دہلی تشریف لے گئے کہ ’’اے سر زمینِ ظفر وال‘‘ میں تیری تبلیغ کو زمین کے کناروں تک پہنچا دوں گا۔(۲۴۷)

دہلی میں آپ ’’تیج‘‘،’’پرتاپ‘‘ اور ’’پردیپ‘‘ کے ایڈیٹر بھی رہے۔ آپ کے شعری کلام کا مجموعہ بعنوان ’’سنگِ میل‘‘ چھپ چکا ہے جو پاکستان میں نایاب ہے۔ جموں یونیورسٹی میں آپ پر پی۔ایچ ڈی کا مقالہ لکھا جا چکا ہے۔ میلا رام نظم اور غزل کے شاعر کے ساتھ ساتھ ناول نگار اور صحافی بھی ہیں۔

ان کی شعری زبان میں شیرینی اور لکھنوی انداز کی جھلک نظر آتی ہے۔ میلارام وفا روایت پسند شاعر ہیں۔ ان کی غزل میں روایتی موضوعات ان کے روایتی شاعر ہونے کی دلیل ہے۔ ان کی نظم میں دھرتی پوجا‘ مقامیت کے عناصر‘ رومانیت اور حقیقت پسندی کا عکس دیکھا جا سکتا ہے۔ تخیل‘ منظر نگاری اور فارسی تراکیب وفا کی نظم کو خوبصورت بناتی ہیں۔

وفا کے قصبے ظفر وال کے پاس سے ’’نالہ ڈیگ‘‘ گزرتا ہے۔ یہ نالہ جموں کے پہاڑی علاقوں سے شروع ہوتا ہے۔ یہ پسرور سے گزرتے ہوئے گوجرانوالہ کا رخ کرتا ہے۔ یہ کھیتوں کو سیراب بھی کرتا ہے لیکن برسات کے موسم میں ظفر وال اور پسرور کے علاقے کے کھیتوں اور مکانوں کو تباہی اور سیلاب سے دوچار بھی کرتا ہے۔ میلا رام وفا اپنی نظم ’’ڈیگ‘‘ میں اس نالہ کو اس طرح خراجِ عقیدت پیش کرتے ہیں:

مرحبا! اے ڈیگ اے جانِ تقدس مرحبا!                     مرحبا! اے مظہرِ شان تقدس مرحبا!            

آتی ہے پربت سے تو اٹھکیلیاں کرتی ہوئی                     ہر جگہ دامان اہلِ آرزو بھرتی ہوئی               

یاس سے جن جن زمینوں کے گزر جاتی ہے تو                               اک اچھالے سے انہیں سیراب کر جاتی ہے تو              

وہ جو کہتے ہیں کہ تو بے مرشد و بے پیر ہے                     کیا خبر ان کو تری کیا عظمت و توقیر ہے          

بے خبر شاکی عبث تیری غضبنا کی کے ہیں                      آہ ! آخر رہنے والے عالمِ خاکی کے ہیں          

وہ تلاطم آشنائے انقلابِ روزگار                  ان کی ہستی سر بسر موجِ سرابِ روزگار        

رکھنا اپنا ہی خیال ان کا یہی دستور ہے                           آپ اگر ڈوبے تو جگ ڈوبا مثل مشہور ہے    

شان خلاقی کو خالق کھو نہیں سکتا کبھی                            بندے کا چاہا ہمیشہ ہو نہیں سکتا کبھی             

آئیں جائیں اور مریں انسان بہہ جاتی ہے تو                    قائم اپنی وضع داری پر رہے جاتی ہے تو         (۲۴۸)

میلارام وفاؔ کی نظم میں سب سے زیادہ فطرت سے لگاؤ کا اظہار ہوتا ہے۔ وفاؔ رومانویت کے نمائندے ہیں۔ مناظر قدرت کے بیان میں ان کا نقطہ نظررومانوی نظر آتا ہے۔ ان کی نظموں میں حسن اور حسنِ فطرت جا بجا بکھر ہوا دیکھا جا سکتا ہے۔ ’’شامِ غربت‘‘ نظم میں وفاؔ نے شام کو مجسم بنا کر پیش کیا ہے۔ ان کی یہ نظم عام فہم فارسی تراکیب سے مزین اور فطری منظر نگاری کا عمدہ نمونہ ہے:

الوداع اے وقت مضرب کی شعاع آخری                   انعقاد بزمِ شب کی اطلاع آخری  

ہوتی جاتی ہے ہم آغوش سوادِ شام سے                         ہے مگر خود کردۂ تاریکیِ ایام سے 

یوں نہ برباد اے سبیلِ اجتماع جلوہ ہو                            جانئی دنیا میں گرم اختراع جلوہ ہو

اُف یہ جاں پرور خرامِ دلربایانہ ترا                               دامن دشت و جبل پر رقصِ مستانہ ترا         

رقص کرتی تو اترتی ہے درو دیوار سے                            رقص کے انداز پیدا ہیں تری رفتار سے       

رقص میں ہیں جانور تیری ادائے رقص پر                    رقص کرتے ہیں شجر تیری ہوائے رقص پر 

چادرِ شب تان کر خورشید خاور سو چلا                             وادی و کہسار و صحرا پر اندھیرا ہو چلا            

چھا رہی ہے غم کی تاریکی دلِ صد پارہ پر                        پھرتی جاتی ہے سیاہی دامنِ نظارہ پر             

آہ! غربت نصیب اور یاد یارانِ وطن                            وہ میرے غمخوار میرے غمگسارانِ وطن       (۲۴۹)

وفاؔ نظریاتی طور پر انگریز سامراج کے سخت مخالف ہیں۔ وہ برطانوی استعمار کو نحوست‘ جبر اور تشدد کی علامت سمجھتے ہیں۔ وہ سچے اور کھرے ہندوستانی ہیں اور ہندوستانیت ان کی نظم کا ایک اہم موضوع ہے۔ وہ ایک قومی شاعر ہیں اور ہندوستانی عوام پر انگریز کے ظلم و تشدد کو برداشت نہیں کر سکتے۔ وہ اپنی نظم ’’فرنگی‘‘ میں برطانوی راج کو اپنی کڑی تنقید کا یوں نشانہ بناتے ہیں:

اے فرنگی کبھی سوچا ہے یہ دل میں تو نے                      اور یہ سوچ کہ کچھ تجھ کو حیا بھی آئی             

نہ مبارک تھا بہت ہند میں آنا تیرا                 قحط آیا تیرے ہم راہ وبا بھی آئی   

تیرے قدموں سے لگی ہوئی غلامی ظالم                        ساتھ ہی اس کے غریبوں کی بلا بھی آئی       

بن گئی بادِ سموم آہ اثر سے تیرے                 اس چمن میں جو کبھی بادِ صبا بھی آئی             

تیرے کلچر میں چمک تو ہے مگر اس میں نظر                  کبھی کچھ روشنیٔ صدق و صفا بھی آئی             

سنگین چمکنے صادقوں پر جنوں ہے                 لب پہ مظلوموں کے فریاد ذرا بھی آئی         

جائے شکر اس میں شکایت تری بیداد کی تھی                  غم نصیبوں کو اگر یادِ خدا بھی آئی 

دردِ افلاس کانیزوں سے کیا تو نے علاج                          موت بن کر تیرے ہاتھوں میں شفا بھی آئی 

اس روش پر کبھی آئی بانی بیداد تجھے                              دل کے اندر سے ملامت بھی صدا بھی آئی    (۲۵۰)

فراق اردو کلاسیکی و روایتی شاعری کا ایک اہم موضوع ہے۔ میلا رام وفا بھی روایتی شاعر ہیں ان کی غزل میں فراق کے حوالے سے بکثرت اشعار دیکھے جا سکتے ہیں:

کچھ نہ کچھ ہو گا مری مشکل کا حل فرقت کی رات                            تم نہ آؤ گی تو آئے گی اجل فرقت کی رات    

ہو رہی ہے شام سے ساکن گھڑی کی سوئیاں                   پاؤں پھیلاتا ہے کیا اک اک پل فرقت کی رات            

زندگی بھر یہ بلا پیچھا نہ چھوڑے گی مرا                          آج جائے گی تو پھر آئے گی کل فرقت کی رات             

صبح کا منہ دیکھنا میرے مقدر میں نہ تھا                          میرا اندیشہ نہ تھا کچھ بے محل فرقت کی رات (۲۵۱)

فلسفہ‘ تخیل کی گہرائی اور مبالغہ آرائی بھی وفا کی شاعری کا حصہ ہیں۔ خصوصاً ان کی غزل میں اس کی جھلک دیکھی جاسکتی ہے:

آ گیا کیا نظمِ ہستی میں خلل فرقت کی رات                     رک گیا کیوں دورِ گردوں کا عمل فرقت کی رات           

سرد سرد آہوں سے یوں آنسو مرے جمتے گئے                              ہو گیا تعمیر اک موتی محل فرقت کی رات      

کچھ نہیں کھلتا کہ آخر اس قدر لمبی ہے کیوں؟                 وصل کے دن کا ہے جب ردِ عمل فرقت کی رات           (۲۵۲)

اُردو کے ہر بڑے شاعر کے ہاں خاموشی ایک اہم موضوع رہا ہے۔

وفا کی غزل میں بھی خاموشی کے عناصر ملتے ہیں:

کہنا ہی میرا کیا ہے کہ میں کچھ نہیں کہتا                          یہ بھی تمہیں دھوکہ ہے کہ میں کچھ نہیں کہتا

یہ بات کہ کہنا ہے مجھے تم سے بہت کچھ                         اس بات سے پیدا ہے کہ میں کچھ نہیں کہتا   

رہتا ہے وہ بت شکوۂ اغیار پہ خاموش                             کہتا ہے تو کہتا ہے کہ میں کچھ نہیں کہتا          

کہلاؤ نہ کچھ غیر کے تعارف میں تجھ سے                        سمجھو تو یہ تھوڑا ہے کہ میں کچھ نہیں کہتا       

کہنے کا تو اپنے ‘ ہے وفاؔ آپ بھی قائل                          کہنے کو یہ کہتا ہے‘ کہ میں کچھ نہیں کہتا         (۲۵۳)

خوشی اور غم انسانی زندگی کا حصہ ہیں۔ انسان ہر حال میں ان جذبات سے دوچار ہوتا ہے۔ شاعر معاشرے میں سب سے زیادہ حساس انسان ہوتا ہے۔ اس لئے عام انسان کے مقابلے میں اس کے احساسات کی شدت زیادہ گہری ہوتی ہے۔ میلارام وفاؔ بھی ایک حساس شاعر ہیں۔ ان کے ہاں غمِ جاناں بھی ہے اور غمِ دوراں بھی۔ وفا ؔکو اپنوں اور بیگانوں کی وجہ سے بھی درود و غم سے دوچار ہونا پڑا :

موت علاجِِ غم تو ہے موت کا آنا سہل نہیں                                جان سے جانا سہل سہی جان کا جانا سہل نہیں 

غم کے کھانے والوں کو کھا جاتے ہیں غم آخر                 غم کا کھانا مشکل ہے غم کا کھانا سہل نہیں       (۲۵۴)

طاقت ضبط غم دل سے رخصت ہوتی جاتی ہے                               ارمان نالے بن بن کر لب پر آتے جاتے ہیں

راتیں عیش و عشرت کی دن دکھ درد مصیبت کے                           آتی آتی آتی ہیں جاتے جاتے جاتے ہیں         (۲۵۵)

درد میں ڈوبے ہوئے ہیں شعر سارے اے وفاؔ                              کس قیامت کی کہی تو نے غزل فرقت کی رات               (۲۵۶)

کب فراغت تھی غمِ صبح ومسا سے مجھ کو                        روز و شب کام رہا آہ و بکا سے مجھ کو (۲۵۷)

دنیا کی زندگی میں انسان کو طرح طرح کی مشکلات کا سامنا کرنا پڑتا ہے۔ ان حالات میں اگر انسان کے اعصاب مضبوط نہ ہوں تو اس کا جینا دوبھر ہو جاتا ہے۔ وفا ؔبھی ایک انسان ہیں انہیں زمانے کی طرف سے اور محبوب کی طرف سے ظلم و ستم کا سامنا ہے۔ وہ آزمائش کی اس گھڑی میں صبر و برداشت کا مظاہرہ کرتے ہیں۔ وہ کڑے حالات کا مردانہ وار مقابلہ کرتے ہیں۔ وہ رجائیت اور امید کے شاعر ہیں۔ ان کا رجائی انداز انہیں ظلم و ستم برداشت کرنے کا حوصلہ فراہم کرتا ہے:

ستم تازہ پہ یوں شکرِ ستم کرتا ہوں                 جیسے اک اور اضافہ ہوا احسانوں میں            (۲۵۸)

جی پر بھی ہم نے جبر کیا اختیار تک                جیتے رہے آخر دمِ انتظار تک       

تم بھی کرو گی جبر شب و روز اس قدر                             ہم بھی کریں گے صبر مگر اختیار تک             (۶۵۹)

پاسِ خاطر سے نہ دشمن کے ستم کر مجھ پر                       کھیلنا آتا ہے اے دوست قضا سے مجھ کو        (۲۶۰)

محبوب کی بے وفائی اور بے اعتنائی بھی ہماری اردو روایتی شاعری کا ایک اہم موضوع ہے۔ میرؔ اور غالبؔ جیسے بڑے شعرا نے بھی محبوب کی بے وفائی اور بے پروائی کا اپنی شاعری میں رونا رویا ہے۔ ایک طرف عاشق صادق کی بے لوث محبت کا ذکر کیا ہے تو دوسری طرف محبوب کی بے حسی ظلم و جبر اور بے نیازی کا ذکر کیا ہے۔ وفا ؔکا تعلق بھی ایسے ہی روایتی شعرا کے قبیلے سے ہے۔ ان کے ہاں بھی محبوب کی بے وفائی اور ظلم و ستم کا ذکر ملتا ہے۔ اس حوالے سے کچھ اشعار ملاحظہ ہوں:

دیارِ حسن میں پابندیٔ رسمِ وفا کم ہے                             بہت کم ہے بہت کم ہے با خدا انتہا کم ہے       

جفائے بے سبب کم ہے کہ جو رِناروا کم ہے                     تری بیداد اے ظالم نہ ہونے پر کیا کم ہے     

بکثرت سیر کی ہے ہر روش گلزارِ عالم کی                         یہاں رنگِ محبت ہے بہت بوئے وفا کم ہے   

رہے کیونکر نہ بد ظن وہ شاہِ حسن اے وفا ؔمجھ سے                           بڑا نادان ہے سنتا بہت ہے دیکھتا کم ہے         (۲۶۱)

شاکی نہیں نخوت گل ہی کا اے وفاؔ                                مجھ سے چمن میں نوک کی لیتے ہیں خار تک    (۲۶۲)

غیر تو ہیں پھر غیر وفاؔ غیروں کا شکوہ ہی کیا                      بد حالی میں اپنے بھی آنکھ چراتے جاتے ہیں   (۲۶۳)

زاہد ناصح شیخ اور واعظ سے چھیڑ چھاڑ اردو روایتی شاعری کا موضوع رہا ہے۔ روایتی شعراء نے واعظ کے قول و فعل میں تضاد کی وجہ سے اس پر گہری چوٹیں کی ہیں۔ میلا رام وفاؔ بھی اپنی غزلوں میں واعظ کو اپنی تنقید کا نشانہ بناتے ہیں:

مے خانہ بھی پڑتا ہے شیخ کو راہِ مسجد میں                        مے خانہ بھی آپ اکثر آتے جاتے ہیں         (۲۶۴)

کام آیا نہ گلہ پھٹتا اے شیخ ! تیرا                    نظر آتی ہیں وہی رونقیں مہ خانوں میں         (۲۶۵)

عشق و جنون ہماری روایتی اور جدید شاعری کا اہم موضوع ہے۔ میلا رام وفا کی غزل میں خصوصاً عشق و جنوں کا اظہار بکثرت ملتا ہے۔وفا سچے عاشق ہیں اور عشق میں اپنی جان بھی قربان کرنے سے پیچھے نہیں ہٹتے:

آندھیوں اور بگولوں سے کم نہیں تیرے دیوانے                          خاک اڑاتے آتے ہیں خاک اڑاتے جاتے ہیں              

آج سحر سے غیر بہت حال تیرے بیمار کا ہے                  افسردہ افسردہ ہیں لوگ جو آتے جاتے ہیں    (۲۶۶)

اے وفا موسم وحشت بھی ہے کیا موسمِ گل                  کیوں بچاتے ہیں گلستان کی ہوا سے مجھ کو       (۲۶۷)

دیکھتی آنکھوں نے دیکھا ہے شبستانوں میں                  جذبہ مرنے کا بھی زندہ ہے پروانوں میں     

کتنا بد حال ہے ماحول شبِ فرقت کا                               خون بھی خشک ہوا جاتا ہے شریانوں میں     (۲۶۸)

روایتی شعراکی طرح وفاؔ کی شاعری میں معاملہ بندی‘ محبوب کی شوخی‘ محبوب کی حیا اور ادا کی عکاسی بھی ملتی ہے۔ وفا کا محبوب شوخ‘ سادہ‘ شرمیلا اور حیا دار شخصیت کا مالک ہے:

اتنی ہی بات پہ بھیگتے ہی چلے جاتے ہو                            لے لو تم بوسۂ لب بوسۂ کے بدلے              (۲۶۹)

کمالِ دلبری میں کون سی تیری ادا کم ہے                       نہ شوخی کم حیا سے ہے نہ شوخی سے حیا کم ہے  (۲۷۰)

رہے کیونکر نہ بد ظن وہ شاہِ حسن اے وفا ؔمجھ سے                           بڑا نادان ہے سنتا بہت ہے دیکھتا کم ہے         (۲۷۱)

وفاؔ حساس انسان ہوتے ہوئے اپنے گردو نواح میں فساد‘ بد امنی‘ بے چینی اور جبر سے کنارہ کش نہیں ہو سکتے۔ انہیں زمانے کے جبر سے بھی شکایت ہے۔ وہ اخلاقیات کے مبلغ ہیں اور امن کے داعی ہیں:

خدا کے نام پر دست و گریباں ہیں خدا والے                 بہت ہے جس قدر ذکرِ خدا خوفِ خدا کم ہے 

ازل سے ہوتی آئی ہے ابد تک ہوتی جائے گی                 گنہگارِ وفاؔ پر جس قدر بھی ہو جفا کم ہے           (۲۷۲)

وفا ؔکے ہاں روایت کے ساتھ ساتھ رومانیت کے عناصر بھی ملتے ہیں۔ وفاؔ باقاعدہ رومانی شاعر نہیں ہیں لیکن ان کی نظم اور غزل میں رومانی اشعار کی جھلک دیکھی جا سکتی ہے:

دیار شک آشفتہ حالوں نے مارا                     ترے حسن پر مرنے والوں نے مارا              

کبھی دل کا ماتم کبھی آرزو کا                           مجھے نت نئے مرنے والوں نے مارا               

ہوا خون سینے میں دل حسرتوں سے                                تمنائیں بن کر خیالوں نے مارا      

تیرا ہی خیال ان کو آٹھوں پہر ہے                               مجھے میرے ہی ہم خیالوں نے مارا (۲۷۳)

زمانے سے شکوہ و شکایت بھی ہمارے کلاسیکی شعرا کا محبوب موضوع رہا ہے۔ وفاؔ نے بھی زمانے سے زخم کھائے ہیں۔ انہیں وفا کے بدلے میں ظلم و جفا سے دوچار ہونا پڑا ہے۔ زمانے کی طرف سے جو رو جبر کے حوالے سے چند ایک شعر ملاحظہ ہوں:

ازل سے ہوتی آئی ہے ابد تک ہوتی جائے گی                 گنہگارِ وفا پر جس قدر بھی ہو جفا کم ہے           (۲۷۴)

زمانہ سے رسم وفا اُٹھ گئی ہے                        زمانہ بڑا بے وفا ہو گیا ہے             (۲۷۵)

۲۴۶۔ آتش کشمیری،’’سرزمینِ ظفر وال‘‘،ص:۳۰۷

۲۴۷۔ ایضاً ،ص: ۳۰۹

۲۴۸۔ ایضاً ، ص: ۳۱۱

۲۴۹۔ ایضاً ، ص: ۳۱۵

250-http:11rht.r/z/-r -l-r--z

۲۵۱۔        ایضاً ، غزل نمبر ۳

۲۵۲۔ ایضاً، غزل نمبر ۳

۲۵۳۔ ایضاً،غزل نمبر ۴

۲۵۴۔ ایضاً ،غزل نمبر ۱

۲۵۵۔ ایضاً ،غزل نمبر ۲

۲۵۶۔ ایضاً،غزل نمبر ۳

۲۵۷۔ ایضاً ، غزل نمبر ۵

۲۵۸۔ ایضاً ،غزل نمبر ۹

۲۵۹۔ ایضاً ،غزل نمبر ۶

۲۶۰۔ ایضاً ، غزل نمبر ۵

۲۶۱۔ ایضاً ، غزل نمبر ۸

۲۶۲۔ ایضاً،غزل نمبر ۶

۲۶۳۔ ایضاً،غزل نمبر ۲

۲۶۴۔ ایضاً ،غزل نمبر ۲

۲۶۵۔ ایضاً ، غزل نمبر ۲

۲۶۶۔ ایضاً، غزل نمبر ۲

۲۶۷۔ ایضاً، غزل نمبر ۵

۲۶۸۔ ایضاً، غزل نمبر ۹

۲۶۹۔ ایضاً ، غزل نمبر ۱۰

۲۷۰۔ ایضاً ، غزل نمبر ۸

۲۷۱۔       ایضاً ،غزل نمبر ۸

۲۷۲۔ ایضاً ،غزل نمبر ۸

۲۷۳۔ ایضاً ،غزل نمبر ۸

۲۷۴۔ ایضاً ،غزل نمبر ۱۱