ادب میں دلچسپی

                ناطق کو بچپن ہی سے ادب میں گہری دلچسپی تھی بتاتے ہیں کہ وہ میٹرک تک نصاب کی کتا بیں نہیں پڑھا کرتے تھے بلکہ دوسری کتابو ں کو پڑھنے اور گھر کے پاس سکول کی لائبریری جانے میں زیادہ دلچسپی تھی اور بقول ان کے انھوں نے بچپن میں ہی ایسی کتا بیں پڑھ رکھی تھیں جن میں کسی کوکم ہی گہری دلچسپی ہو سکتی ہے مثلاً ’’داستان امیر حمزہ‘‘’’الف لیلا‘‘ یہ کتابیں وہ بچپن میں ہی پڑھ چکے تھے اور ان میں سے بہت سے صفحات ان کو زبانی یاد بھی تھے ایک دلچسپ واقعہ جس کاذکر کرتے ہوئے وہ کہتے ہیں :

’’آب حیات کتاب جب میں نے پڑھی تو وہ مجھے ایسے ماحول اور کلچر میں لے گئی کہ وہ کتاب میں نے تقریباًچالیس دفعہ پڑھی ہوگی جب بھی پڑھتا ہوں تو ایک نیا لطف آتا ہے۔میں نے سوچا کہ شاعر ایسے ہوتے ہیں یہ تو بہت اچھے لوگ ہیں اور ان کی حرکتیں  بھی مجھے راس آئیں اس میں جتنے شاعر تھے میرے لیے خاص طور پر ان دنوں وہاں مجھے انشاء جی بہت بھائے جس طرح مولوی آزاد صاحب نے مصحفی ساتھ ان کی مبالغہ آرائی کروائی ہے۔بچپن میں ایک بندے کو ہیرو کی طرح سمجھ لیا جاتا ہے میرے لیے مصحفی ان دنوں ولن تھا مولوی آزاد نے ان کو ولن بنا کررکھ دیا تھا۔اب ہوش آیا توپتا چلا مولوی آزاد کیسے کھیل کھیلتے تھے۔(2)

                کتابوں سے دلچسپی ان کی نہ صرف ادب سے راہیں ہموار کرتی گئی بلکہ ادبی دنیا میں ممتاز لکھاری کے طور پر پہچان کا باعث بنی۔