تخلیقات

                ناطق نے شاعری سے آغاز کرتے ہوئے نثر میں بھی قسمت آزمائی اور بطور نقاد بھی اپنے فن کا مظاہرہ کیاہے۔شاعری میں نظمیں اور غزلیں دونوں میں ایک انوکھا پن نظر آتا ہے یقینایہ ان کی تخیل پہ گرفت کامنہ بولتا ثبوت ہیں۔افسانوں میں ایک خاص قسم کا رنگ نظر آتاہے معاشرے کی نمائندگی کرتے کرداروں میں بھی وہی مزاج پایا جاتا ہے جہاں وہ معاشرے کے رہن سہن کی عکاسی کررہے ہوتے ہیں۔ناول نگاری میں ان کو دیہات اور اس کے کرداروں کی بازیافت کا آدمی کہا جاتا ہے۔وہ کرداروں کو حقیقت کی زندگی دینے والے ہیں،پڑھتے ہوئے قاری کو محسوس ہوتا ہے کہ وہ خود بھی ان کرداروں میں سے ایک کردار ہے جوسب کچھ اپنی آنکھوں سے دیکھ رہا ہے۔دیہاتی زندگی کو اس قدر وضاحت سے بتاتے ہیں کہ ایک ایک منظر آنکھوں کے سامنے پھر جاتا ہے،اپنے ناول نولکھی کوٹھی اور کماری والا دونوں ہی میں انہوں نے دیہاتی زندگی کے مناظر بیان کیے ہیں۔ان کی تخلیقات کا مختصر تعارف پیش کیا جارہا ہے۔