جزئیات نگاری

                ناطق نے ناول میں جزئیات نگاری سے کام لیاہے عصری دور میں جزئیات نگاری کواتنی اہمیت نہیں دی جاتی۔مصنف نے اس کے برعکس اپنے ناول’’کماری والا‘‘میں جزئیات نگاری کو بڑھا دیا ہے اور ہر ایک واقعے کی جزئیات کو بیان کیا ہے۔اس طرح ایک طرف تو تحریر میں خوبصورتی پیدا ہوئی پر ساتھ ساتھ کہانی غیر ضروری طوالت میں چلی گئی۔ وہ اپنی زندگی میں جن حالات سے گزر چکے ہیں انھوں نے ان سب کو بتانے کی کوشش کی ہے۔ایک ایک پل کو اس طرح بتایا ہے کہ قاری’’ضامن‘‘کی زندگی کو جزئیات نگاری کی وجہ سے مکمل جانتا ہے وہ کب ،کس پل ،کہاں ،کیا کرتا ہے سب باتوں کو ناطق نے تفصیلاًبیان کیا ہے۔بات یہ بھی درست ہے کہ جب قاری ناول پڑھتا ہے تو اسے خود حالات و واقعات کو مکمل جان لینے کی دھن ہوتی ہے۔اس لیے اگر مصنف نے ان حالات کو مدنظر نہ رکھا ہو تا تو ناول صرف ایک بیانیہ کہلاتا۔جزئیات نگاری قاری کی دلچسپی کو بڑھاتی ہے۔مصنف نے بھی ناول میں مکمل ماحول کا نقشہ قاری کے ذہن میں ابھارا ہے اپنی جزئیات نگاری کی مدد سے یہ قاری کیلئے انہماک کا ذریعہ ہے۔

مقصد حیات

                ہم جو بھی پڑھتے ہیں اس سے متاثر ضرور ہوتے ہیں۔اسی طرح ناول نگار بھی کسی زندگی کی عکاسی کرتاہے اور جس زندگی کی عکاسی کر رہا ہوتا ہے وہ مقصد سے خالی نہیں ہوتی۔ناول نگار قاری کیاحساسات کے بارے میں آگاہ ہوتا ہے۔اس لیے وہ انسانی نفسیات کو سمجھتے ہوئے ایک کہانی تخلیق کرتا ہے۔ایک استاد کی طرح اپنی بات کو قاری کے ذہن تک پہنچانے کا مقصد صرف اور صرف یہ ہوتا ہے کہ ایک خاص قسم کا فلسفہ اس کے ذہن میں زبردستی ڈالا جاتا ہے۔

                ناول نگار نے بھی ایک مقصدی کہانی لکھی ہے۔ وہ اپنی اس کہانی کے ذریعے ہمیں کرپشن اور ملک سے غداری کرنے والوں کو بینقاب کررہے ہیں۔وہ سیکس انڈسٹری کی ایک واضح تصویر اور اس کے نتائج کو ہمارے سامنے پیش کررہے ہیں جوکہ ایک عمدہ قدم ہے۔یقیناًنو لکھی کوٹھی کے بعد ناطق کا یہ دوسرا انتہائی شاندار ناول ہے جو یاد رکھے جانے کے قابل ہوگا۔ہر موڑ قاری کو ایک نئی راہ سے متعارف کروارہا ہے شوبز کی دنیا ایک جھانسہ ہے۔ہمارے معاشرے میں چلتے پھرتے لوگوں کے بارے میں خلاصہ کیاگیا ہے۔جائیداد کا لالچ تو ایک الگ بات ،اس پہ نسل در نسل بات پر اس طرح مٹی ڈال دی جاتی ہے کہ وہ ایک معمہ بن جائے اور حل نہ ہوپائے۔ناطق نے بہت ہی جانب داری کا مظاہرہ کیا ہے اور محسوسات کے مطابق ایک مقصدی کہانی لکھی ہے۔